Қашқадарё вилояти Чироқчи туманида икки Cobalt автомашинаси иштирокида йўл-транспорт ҳодисаси содир бўлди, дея хабар бермоқда ИИБ.
Маълум қилинишича, 2020 йил 1 ноябрь соат 21:30 ларда Ғузор–Самарқанд йўлининг 85 километрида Тошкент–Сурхондарё йўналишида ҳаракатланиб келаётган Cobalt автомашинаси ҳайдовчиси тезликни ошириши натижасида бошқарувни йўқотган.
Бунинг натижасида йўлнинг қарама-қарши томонига ўтиб кетган автомобиль катта тезликда келаётган Cobalt билан тўқнашган.
Оқибатда икки Cobalt’нинг 1 нафардан йўловчиси воқеа жойида ҳалок бўлган. Икки ҳайдовчи ўрта даражада оғир тан жароҳати олиб шифохонага ётқизилган. Шу билан бирга икки автомашинадаги бошқа йўловчилар ҳам турли даражада тан жароҳати олиб шифохонага етказилган.
Ҳодиса юзасидан Чироқчи тумани ИИБ Тергов бўлими томонидан жиноий иш очилиб, тергов ҳаракатлари олиб борилмоқда.
Аввалроқ Навоийда маст ҳайдовчи содир этган ЙТҲ оқибатида 27 ёшли йигит бир қўлидан айрилгани, Андижонда чироқлари электрдан қарздорлик сабаб ўчириб қўйилган қоронғи трассадаги ЙТҲ оқибатида икки киши ҳалок бўлгани ҳамда Гулистонда ЙҲХБнинг Mercedes машинаси «Нива»га урилиб, уни ағдариб юборгани ҳақида хабар берилганди.
Изоҳ (0)