Данғара туманининг собиқ бош солиқчиси «обнал» билан шуғулланадиган 22 та фирма очгани маълум бўлди

Ўзбекистонда ўтган икки йилда мансаб ваколатларини суиистеъмол қилганлиги учун 31 нафар солиқ ходимлари жиноий жавобгарликка тортилган. Бу ҳақда 7 ноябрь куни ташкил этилган коррупция масалаларига оид идоралараро йиғилишда бош прокурор Ниғматилла Йўлдошев маълум қилди.

Масалан, Данғара тумани давлат солиқ инспекцияси раҳбари Турғунбоев коррупцияга мойиллиги туфайли солиқ хизматидан бўшатилган Мўминов ва Каримовни ишга қабул қилиб, пул маблағларини нақдлаштириш билан шуғулланувчи жиноий гуруҳ тузган. Уюшган гуруҳ бошқа фуқаролар номига 22 та сохта фирмаларни очиб, уларга норасмий раҳбарлик қилиб келган.

Ушбу фирмаларда 268 миллиард сўмлик ноқонуний пул айланмалари амалга оширилиб, 19 миллиард сўм солиқ тўловидан қочишга эришилган, шунингдек, жиноий йўл билан топилган 200 миллион сўм легаллаштирилган. Ҳозирда Турғунбоев ва унинг 14 нафар жиноий шериклари судда жавоб бермоқда.

Эслатиб ўтамиз, аввалроқ Ўзбекистонда ўтган икки йилда 1 минг 986 нафар мансабдор шахс, молия органларининг 41 нафар ходимлари коррупциявий жиноятларни содир этганлиги учун жиноий жавобгарликка тортилгани, «Халқ банки» собиқ раҳбари жиноий гуруҳ тузгани, «Арк булоқ» божхона пости собиқ бошлиғи олган пораларини Бўстонлиқдан дала ҳовли, Tashkent City’дан 2 та уй, битта нотурар жой ва Captiva харид қилишга сарфлагани, «Янгиобод ихтисослашган бозори» директори қатор коррупциявий жиноятларни содир этишда айблангани ҳақида хабарлар берилган эди.