2020 йилда «Лукойл» Ўзбекистон ички бозорига 5 миллиард куб метр газни реализация қилди. «Gazeta.uz»нинг хабар беришича, бу ҳақда матбуот анжуманида Энергетика вазири ўринбосари Беҳзод Норматов маълум қилди.
Энергетика вазири ўринбосари Россия компанияси «зангори ёқилғи» экспортини бутунлай тўхтатгани ҳақидаги хабарларни рад этди.
«Пандемия туфайли асосий истеъмолчимиз Хитойдан талаб камайганлигига экспортимиз ҳам қарийб 5 бараварга камайди. Лукойл бу борада экспортини тўхтатгани йўқ», — деган у.
Беҳзод Норматовнинг айтишича, «Лукойл» экспорт ҳажмини камайтириш ва минимал даражада сақлашга қарор қилди, чунки компания газни «тўғри келмайдиган нархда» экспорт қилмайди.
Шунга қарамай, биз «Лукойл» билан газ ҳажмини ички бозорга йўналтириш бўйича музокаралар олиб бордик. Экспорт ҳажмлари ва экспорт нархлари конфиденциал маълумот ҳисобланади. Лекин Ўзбекистон бу йил «Лукойл»дан бирламчи 5 миллиард куб метр газни келишилган нархда сотиб олди. Албатта, газ экспорт нархидан анча паст нархда сотиб олинган. «Лукойл» компанияси билан келишувимиз бор, қўшимча талаб керак бўладиган бўлса, газни келишилган нархларда ички бозорга йўналтиришимиз мумкин», — деган Беҳзод Норматов.
2019 йилнинг мартида «Лукойл» томонидан ички бозорга йилига 5 миллиард куб метр миқдоридаги газни олдиндан тўлов асосида ўртача ҳисобланган экспорт нетбекига нисбатан 12,5 фоизлик чегирма билан етказиб бериш тўғрисидаги келишувга эришилгани маълум қилинганди.
2020 йилнинг октябрида ўтказилган йиғилишда Президент Шавкат Мирзиёев табиий газ қазиб олишни кўпайтириш ва ички бозорга қўшимча газ етказиб бериш бўйича топшириқлар берганди. Бунда йилнинг ўтган тўққиз ойида газ қазиб чиқариш деярли 20 фоизга камайган, яъни 44,8 миллиарддан 36 миллиард кубометргача. Газ конденсати эса 35 фоизга ёки 1,5 миллион тоннадан 1 миллион тоннагача камайган.
2020 йилнинг июлида «Лукойл» компанияси коронавирус сабаб Хитойда газга бўлган талаб камайиб кетгани боис Ўзбекистонда газ қазиб олишни лойиҳа қувватидан 40 фоизга қисқартиргани маълум қилинганди. Натижада компания газни ички бозорга йўналтириш бўйича Ўзбекистон билан келишувга эришди.
Изоҳ (0)