Бош прокурор Ниғматилла Йўлдошев бюджет маблағларининг рационал тақсимланиши ва мақсадли ишлатилиши юзасидан давлат назоратига масъул молия органларида юклатилган вазифалар талаб даражасида бажарилмаётганини танқид қилди, деб хабар беради «Дарё» мухбири.
Йиғилишда таъкидланишича, молия органларининг бюджет сарфини тўлақонли назорат қилишига тизимдаги коррупция ҳолатлари ҳам тўсқинлик қилмоқда.
2018-2019 йилларда ҳуқуқни муҳофаза қилувчи органлар ташаббуси билан ўтказилган текширишларда 131 миллиард сўмлик талон-торожликлар фош этилган бир пайтда давлат молиявий назорат идоралари ташаббуси билан 79,4 миллиард сўмлик ёки қарийб икки баравар кам талон-торож қилиш ҳолатлари аниқланган. Молия органларининг бюджет сарфини тўлақонли назорат қилишига, давлат хариди билан боғлиқ йирик талон-торожликларни аниқлашига нима тўсқинлик қилади? Бу аслида коррупция эмасми?«Ўтган икки йилда молия органларининг 41 нафар ходими коррупция ҳолатлари учун жиноий жавобгарликка тортилган», — дейди бош прокурор. Ушбу идораларда, асосан, аниқланган қонун бузилиши ҳолатларини яшириш, текшириш ўтказмаслик, бюджетдан ажратилган маблағни ўз вақтида ўтказиб бермаслик, штат бирликларини белгилаш жараёнида суиистеъмолчиликлар кўплаб содир этилган.Ниғматилла Йўлдошев, бош прокурор
Масалан, Давлат молиявий назорати департаментининг Сурхондарё вилояти бошқармаси бош назоратчи-тафтишчиси Нурманов Узун қурилиш коллежида аниқланган 265 миллион сўмлик камомадни яшириш эвазига коллеж бош ҳисобчиси Алланазаровдан 2000 доллар ва 500 минг сўм олганлиги учун суд ҳукми билан жазога тортилган.
Олмалиқ шаҳар молия бўлимининг бошлиғи биринчи ўринбосари Эрқулов туғруқ комплекси бош шифокори Тўраевадан комплексга қўшимча 10 та штат бирлиги ажратиш масаласини ҳал қилиб бериш эвазига 800 доллар олганлиги учун суд ҳукми билан жазога тортилган.
Энг асосий ва ташвишлиси, бюджет назоратига масъул бўлган ушбу вазирлик тизимининг (Молия вазирлиги назарда тутилган — таҳрир.) ўзида ҳам бюджет маблағлари тап тортмасдан очиқдан очиқ талон-торож қилинмоқда. Эътибор беринг, ғазначиликнинг Андижон вилояти бошқармаси мансабдор шахслари ходимларга иш ҳақи бериш важи билан банкдан 1 миллиард сўм ортиқча пул олишга эришиб, уни шахсий эҳтиёжлари учун сарфлаб юборганлиги юзасидан жиноят иши қўзғатилиб, тергов ўтказилмоқда.Ниғматилла Йўлдошев, бош прокурор
Изоҳ (0)