Олий Мажлис Қонунчилик палатаси депутатлари Расул Кушербаев, Дониёр Ғаниев ҳамда Бекмирза Эшмурзаев Молия вазирлиги ва Давлат божхона қўмитасига импорт машиналар бож тўловига оид депутатлик сўрови юборгани ҳақида хабар берилганди.
Депутатлар 2020 йил 23 октябрь куни ҳукуматдан импорт қилинаётган машиналар юзасидан пайдо бўлаётган масалаларга изоҳ беришини сўраганди. Расул Кушербаев, Дониёр Ғаниев ва Бекмирза Эшмурзаевнинг фикрича, импорт қилинаётган автомашиналар учун UzAuto Motors ва Жиззах автомобиль заводи томонидан импорт божи ва утилизация йиғими тўланмаётган бўлиши мумкин.
Расул Кушербаевнинг маълум қилишича, 5 ноябрь куни мазкур сўровга Давлат божхона қўмитасидан жавоб келгани ҳақида унга хабар берилган, аммо жавоб депутатларнинг қўлига берилмаган. Чунки жавоб махфий ҳужжат сифатида юборилган.
«Тасаввур қиляпсизми: жамиятни, жамоатчиликни қизиқтираётган, давлат ва жамият хавфсизлигига боғлиқ бўлмаган масалада бизнинг очиқ юбораётган сўровларимизга жавоблар махфий, қўмита раисининг нуқтаи назари ҳам махфий ва биз ундан фойдалана олмаймиз. Кулишни ҳам, йиғлашни ҳам билмайсан.
Бошқалардан фарқли ўлароқ депутат фаолияти очиқ бўлиб, жамоатчиликни қизиқтирган масалалар юзасидан ошкора мулоқотлар олиб боришни бурчимиз деб билганимиз сабабли келгусида бизни қандайдир ‘қўрқинчли сиръларни ошкор этиб, йўқ обрўсини туширишда айбламасликларини хоҳладик. Шундоқ ҳам пайт пойлаб туришибди.
Шу нуқтаи назардан қўлимизга олиш мумкин бўлмаса-да, фақат танишиб, кейин жим юрилиши керак бўлган махфий жавоб билан танишишдан бош тортдик. Шу боис бу сўровга жавоб олмадик, деб ҳисобласак ҳам бўлаверади», — деб ёзган депутат.
«Катта эҳтимол билан Молия вазири ҳам жавобда шундай ‘приём’ қўлласа керак. Кутамиз, лекин қайтиш йўқ», — дея қўшимча қилган Кушербаев.
Эслатиб ўтамиз, UzAuto Motors компаниясининг Ўзбекистон Монополияга қарши курашиш қўмитаси махсус комиссиясининг 2020 йил 19 августдаги қарорини ҳақиқий эмас деб топиш тўғрисидаги шикоят аризасини кўриб чиқиш бўйича ўтказилаётган суд жараёнида UzAuto Motors товарлар нархини шакллантириш махфий ҳужжатларга асосланганини билдирган ва суд 16 октябрдаги мажлисда ишни ёпиқ тартибда кўришни бошлаганди. Якунда эса суд ишни UzAuto Motors фойдасига ҳал қилиб, Монополияга қарши курашиш қўмитаси махсус комиссиясининг қарорини ҳақиқий эмас деб топганди.
Расул Кушербаев суднинг мазкур қарорига муносабат билдириб, «Янги Ўзбекистондаги эски Ўзбекистонга ‘ғалаба’ муборак», — деб ёзганди.
Шунингдек, Монополияга қарши курашиш қўмитаси томонидан ўтказилган текширув якунлари бўйича UzAuto Motors АЖда қонунчилик ҳужжатларининг бузилиши, коррупцион ҳолатлар ва истеъмолчиларнинг ҳуқуқларига путур етказиш каби аломатлар кўринаётганлиги сабабли Расул Кушербаев бир гуруҳ депутатлар билан бирга Бош прокуратура маҳкамаси томонидан ўрганилиб, ҳуқуқий баҳо берилиши ва жиноят аломатлари бор ёки йўқлиги юзасидан ўз нуқтаи назарини баён этишни сўраб, 2020 йилнинг 21 август куни бош прокурорга депутатлик сўрови юборган. Бош прокурорга йўллаган сўровга 65 кун кечикиб жавоб қайтарилган ва UzAuto Motors’га қарши жиноий иш очиш рад этилган.
Изоҳ (0)