Президент Шавкат Мирзиёев 6 ноябрь куни соғлиқни сақлаш соҳасидаги жорий вазиятга бағишланган видеоселектор йиғилиши ўтказиши кутилмоқда. Бу ҳақда «Дарё» манбаси маълум қилди.
Манбанинг маълум қилишича, йиғилишда асосий эътибор коронавирусга қарши курашиш эмас, балки «кўплаб эътирозларга сабаб бўлаётган Соғлиқни сақлаш вазирлиги тизимини тўлиқ ўзгартиришга қаратилади».
«Айниқса бирламчи бўғинга саволлар тўпланиб қолган. Оилавий поликлиника ва қишлоқ врачлик пунктлари тизимини қайта кўриб чиқиш, молиялаштириш ва кадрлар тайёрлаш масалаларини муҳокама қилиш режалаштирилган», — деди манба.
Бундан ташқари, аҳоли орасида соғлом турмуш тарзини шакллантириш масалалари кўриб чиқилади.
Эслатиб ўтамиз, Президентнинг 3 ноябрдаги фармони билан Абдуҳаким Хожибоев соғлиқни сақлаш вазири этиб тайинланганди. Хожибоев 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётганди. 2020 йил 16 июлидан Президент маслаҳатчиси ўринбосари вазифасида ишлаб келган Амрилло Иноятов унинг биринчи ўринбосари этиб тайинланди.
2017 йилнинг февралидан буён соғлиқни сақлаш вазири сифатида фаолият юритган Алишер Шодмонов эса Тошкент тиббиёт академияси ректори этиб тайинланган. 2016 йилдан буён Тошкент тиббиёт академияси ректори вазифасида ишлаб келган Лазиз Тўйчиев Президент маслаҳатчисининг биринчи ўринбосари лавозимига тайинланди.
Изоҳ (0)