Toshkent tibbiyot akademiyasi sobiq rektori Prezident maslahatchisining birinchi o‘rinbosari lavozimiga tayinlandi

2016-yildan buyon Toshkent tibbiyot akademiyasi rektori vazifasida ishlab kelgan To‘ychiyev Laziz Nodirovich O‘zbekiston Respublikasi Prezidentining yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisining birinchi o‘rinbosari vazifasiga tayinlandi. Bu haqda Sog‘liqni saqlash vazirligi axborot xizmati xabar bergan.

“Tibbiyot fanlari doktori, professor Laziz To‘ychiyev bundan avval Epidemiologiya, mikrobiologiya va yuqumli kasalliklar ilmiy-tekshirish instituti direktori va O‘zbekiston Respublikasi sog‘liqni saqlash vaziri o‘rinbosari kabi mas’ul lavozimlarda mehnat qilgan”, – deyiladi vazirlik xabarida.

To‘ychiyev 2020-yilda “Fidokorona xizmatlari uchun” ordeni bilan mukofotlangan.

Eslatib o‘tamiz, Oliy Majlis Qonunchilik palatasi deputatlari 3-noyabr kuni O‘zbekiston sog‘liqni saqlash vaziri lavozimiga 2020-yil 15-iyul kunidan beri sog‘liqni saqlash vaziri birinchi o‘rinbosari sifatida ishlayotgan Abduhakim Mo‘minovich Xojiboyev nomzodini ma’qullagan. Keyinchalik 2017-yilning fevral oyidan buyon sog‘liqni saqlash vaziri sifatida faoliyat olib borayotgan Alisher Shodmonov Toshkent tibbiyot akademiyasi rektori etib tayinlangani xabar qilingandi.

Oradan bir necha soat o‘tgach, O‘zbekiston Prezidentining farmoni bilan Abduhakim Xojiboyev sog‘liqni saqlash vaziri etib, O‘zbekiston Prezidentining yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi o‘rinbosari vazifasida ishlab kelgan Inoyatov Amrillo Shodiyevich sog‘liqni saqlash vazirining birinchi o‘rinbosari etib tayinlandi.