Шавкат Мирзиёев: Соғлиқни сақлаш вазирлиги фаолиятига, унинг кадрлар масаласига энди ҳеч ким аралашмайди
Айни пайтда Ўзбекистон Президенти Шавкат Мирзиёев раислигида Соғлиқни сақлаш соҳасини ислоҳ қилишга бағишланган видеоселектор йиғилиши бўлиб ўтмоқда. Бу ҳақда «Дарё» мухбири хабар бермоқда.
Танқидий-таҳлилий руҳда кечаётган мажлисда таъкидланишича, тор соҳа шифокорларининг 60 фоиз вақти фақат маслаҳат беришга сарфланмоқда.
«Навбатдаги вазифа – амалдаги соғлиқни сақлаш тизимини ислоҳ қилишимиз зарур ва шарт. Буни ҳаётнинг ўзи кўрсатиб турибди. Жумладан, бирламчи бўғин бўлмиш қишлоқ врачлик пунктлари ва оилавий поликлиникалар иш олиб бормаётгани учун аҳоли тўғридан-тўғри марказий поликлиника ёки шифохоналарга мурожаат қилмоқда. Натижада, тор соҳа шифокорларининг 60 фоиз вақти фақат маслаҳат беришга сарфланмоқда. Афсуски, бу бўғиннинг масъулияти ва жавобгарлиги аниқ белгиланмаган.
2019 йилда мамлакатда ўлим ҳолатларининг 60 фоизи тиббиётнинг бирламчи бўғини томонидан олдини олиш мумкин бўлган юрак-қон томир тизими касалликлари ҳисобига тўғри келади. 23 минг нафар бемор гипертониядан, 7 минг нафар инфарктдан, 5 минг нафар қандли диабетдан, 3,6 минг нафар инсультдан вафот этган.
Энди вазирлик фаолиятига, унинг кадрлар масаласига ҳеч ким аралашмайди. Врач, касалхона, поликлиникалар бош шифокорлари ёки бошқа тиббиёт ходимлари бирорта қўшимча ишга жалб қилинмайди. Президент ва бош вазирдан бошқа бирорта раҳбар вазир ва унинг ўринбосарларини йиғилишларга чақириши тақиқланади. Бу талаб жойларда ҳокимларга ҳам тегишли.
Соғлиқни сақлаш тизими ҳолатини ўрганиб чиқиш учун 2 та ишчи гуруҳи ташкил этилади. Вазир А.Хожибоев раҳбарлигидаги 1-гуруҳ – водий вилоятлари, Жиззах, Самарқанд, Тошкент вилоятлари ва Тошкент шаҳрига. Вазирнинг биринчи ўринбосари Амирилло Иноятов раҳбарлигидаги 2-гуруҳ – Қорақалпоғистон Республикаси, Хоразм, Бухоро, Навоий, Қашқадарё, Сурхондарё ва Сирдарё вилоятларига бириктирилади.
Ишчи гуруҳлар икки ой муддатда қишлоқ врачлик пунктлари ва оилавий поликлиникалардаги тиббий хизматни ташкил этиш тизими, шифокорлар ва ўрта тиббиёт ходимларининг вазифа ва функцияларини тўлиқ қайта кўриб чиқиши лозим», деди давлат раҳбари.
Аввалроқ Соғлиқни сақлаш вазирлиги тизимида қатор тайинловлар амалга оширилганди. Хусусан Абдуҳаким Хожибоев Ўзбекистон соғлиқни сақлаш вазири, Алишер Шодмонов Тошкент тиббиёт академияси ректори ва Тошкент тиббиёт академияси собиқ ректори Президент маслаҳатчисининг биринчи ўринбосари лавозимига тайинлангани ҳақида хабар берилган эди.
