Ижтимоий тармоқларда UМО серияли давлат рақами тақилган BMW автомобилининг суратлари тарқалиб, турли баҳсларга сабаб бўлгани ва ҳолат юзасидан ИИВ ЙҲХББ изоҳ бергани тўғрисида хабар берилганди. Идора ахборот хизматининг маълум қилишича, ЙПХ ходимларига ушбу ҳарф ва рақамлар комбинацияга эга автомобилларни тўхтатмаслик тўғрисида топшириқ бўлмаган.
«Ижтимоий тармоқларда тарқалган айнан 01 088 UМО давлат рақами белгиси бирор-бир юридик шахсга тегишли бўлган автотранспорт воситасига расмийлаштирилмаган», — дейилади хабарда.
Шунингдек, маълум қилинишича, тармоқларда тарқалган овоз ЙПХ ходимига тегишлилиги ҳақида асосли маълумотлар мавжуд эмас.
«Ходимларга ушбу ҳарф ва рақамлар комбинациясига эга бўлган давлат рақами белгили транспорт воситаларини тўхтатмаслик бўйича топшириқлар берилмаганлигини маълум қиламиз», — дея қайд этади ЙҲХББ ахборот хизмати.
Эслатиб ўтамиз, ижтимоий тармоқларда тарқалган аудиоёзувда UМО серияли давлат рақами таққан машиналар UZB серияли рақам таққан автомобиллар каби ЙПХ ходимлари томонидан тўхтатилмаслиги кераклиги ҳақида топшириқ берилгани айтилган. Аудиоёзувдан гўёки ЙПХ инспекторларига топшириқ берилаётгандек таассурот уйғонган.
Аввалроқ ЙҲХББ ахборот хизмати UМО серияли харидоргир ҳарф ва рақамлар комбинациясига эга бўлган давлат рақами белгилари базавий ҳисоблаш миқдорининг 150 баравари асосида буюртмага мувофиқ, ўрнатилган тартибда транспорт воситаларига расмийлаштириб берилганини маълум қилганди.
Изоҳ (0)