Эндиликда илғор хорижий тажриба асосида, умумий амалиёт шифокорини ҳақиқий оилавий шифокорга айлантириб, уларга ёрдам берадиган ўрта тиббиёт ходимларидан иборат терапия, педиатрия, акушерлик ва патронаж бўйича «тиббиёт бригадалари» ташкил этилади. Бу ҳақда айни пайтда Шавкат Мирзиёев раислигида ўтказилаётган Соғлиқни сақлаш соҳасини ислоҳ қилишга бағишланган видеоселектор йиғилишида сўз борди, дея хабар бермоқда «Дарё» мухбири.
Давлат раҳбари «тиббиёт бригадалари» ўзларига бириктирилган маҳаллаларда оилалар кесимида «тиббий харита»ни шакллантириши, унга оила аъзолари, уларнинг саломатлиги ҳақидаги барча маълумотлар киритилиб, аҳоли билан манзилли иш йўлга қўйилишини таъкидлади.
«‘Тиббиёт бригадалари’ маҳалла ва оилалар кесимида юқумли бўлмаган касалликларни эрта аниқлаш бўйича манзилли скрининг тадбирларини ўтказади. Шунинг учун ҳомиладорлар, 5 ёшгача бўлган болалар, туғиш ёшидаги ва 35 ёшдан ошган аёллар, 40 ёшдан ошган шахслар доимий назоратга олиниб, скрининг текширувлари амалга оширилиши зарур. Бунда ортиқча вазн, юқори қон босими бор, қандли диабет, инфаркт, инсульт, онкологик ва бошқа ижтимоий касалликларга мойил бўлганларнинг алоҳида рўйхати юритилиб, улар индивидуал патронажга олинади.
Бундан буён бепул тиббий ёрдам учун тор соҳа шифокорлари, туман (шаҳар), вилоят ва республика шифохоналарига йўлланмани оилавий шифокор беради. Шунингдек, бепул тарқатиладиган дориларга рецепт бериш ҳам оилавий шифокорларга юклатилади. Маҳалладаги аҳолининг саломатлик кўрсаткичлари, ҳудуддаги касалликларнинг ўсиши, аҳолининг шифохоналарга ётиши ва тез ёрдамга мурожаатига қараб оилавий шифокорлар фаолиятига баҳо берилади. Қайси оилавий шифокор аҳолига кўпроқ ва сифатли хизмат кўрсаца, шунга яраша у ўзининг бригадаси билан кўпроқ ойлик олади», – деди Шавкат Мирзиёев.
Ўзбекистон Президенти йил якунига қадар Сирдарё вилояти қишлоқ врачлик пунктлари ва оилавий поликлиникаларида жами 220 та «тиббиёт бригадаси»ни ташкил этиб, уларга 1 минг 200 нафар ўрта тиббиёт ходимларини бириктириш бўйича топшириқ берди.
«Келаси йил 1 мартга қадар ушбу ‘тиббиёт бригадалари’ ‘оилавий тиббиёт’ бўйича илғор тажриба асосида ўқитилсин. Бошқа вилоят ҳокимлари келгуси йил 1 апрелга қадар ‘тиббий харитаъни шакллантиришни 26 та туман ва шаҳарларда ҳам йўлга қўйиши зарур. Бунинг учун ушбу туман ва шаҳар ҳокимлари тиббиёт бирлашмалари раҳбарлари билан бирга, икки ой муддатда аҳолини хатловдан ўтказиб, уларни тиббиёт муассасаларига бириктиради.
Шунингдек, ‘тиббиёт бригадалари’ томонидан аҳолининг саломатлик ҳолати баҳоланиб, уларнинг электрон базаси яратилади. Бунда, вилоят, туман ва шаҳар ҳокимлари маҳаллий бюджет ҳисобидан ‘тиббиёт бригадалариъни планшет, мобил тиббиёт-диагностика воситалари (тарози, пульсоксиметр, тонометр, мобил ЭКГ) билан таъминлайди. Шу билан бирга, ушбу туманлардаги қишлоқ врачлик пунктлари ва поликлиникалари тезкор интернетга уланиши шарт.
Бундан ташқари фаолияти қайта ташкил этиладиган патронаж ҳамшираларини алоҳида ўқитиб, хавф гуруҳига кирувчи аҳоли билан манзилли ишлашга ўргатиш керак. Қишлоқ врачлик пункти ва оилавий поликлиникалар рейтингини аниқлаш тизимини жорий қилинади. Бунда, рейтингда юқори ўринни эгаллаган 3 та тиббиёт муассасаси маҳаллий бюджетдан мукофотланади», – деди давлат раҳбари.
Изоҳ (0)