Айни вақтда Президент Шавкат Мирзиёев раислигида Соғлиқни сақлаш соҳасини ислоҳ қилишга бағишланган видеоселектор йиғилиши давом этмоқда.
Селектор давомида Соғлиқни сақлаш тизимининг бирламчи бўғинидаги даволаш сифати ҳақида тўхталиб ўтилди. Бунинг учун шароит ва кадрлар етишмаслиги айтиб ўтилди. Таъкидланишича, ходимларни рағбатлантириш, малакаси ва лавозимини оширишга эътибор йўқ.
«Кўплаб касалликлар асосан кечқурун хуруж қилишини инобатга олиб, қишлоқ врачлик пунктлари ва оилавий поликлиникаларда навбатчилик асосида туну-кун ишлайдиган тартибни жорий қилиш зарур. Қишлоқ врачлик пунктлари ва оилавий поликлиникаларда 20 мингдан зиёд врачлик штати мавжуд бўлсада, унда 12 минг нафар шифокор ишламоқда. Сабаби, бугунги кунда умумий амалиёт шифокори касби тиббиёт олийгоҳлари битирувчилари учун жозибадор эмас» – деди Шавкат Мирзиёев.
Шу боис Президент шифокорларга муносиб шароитлар яратиш орқали уларни энг қуйи бўғин – қишлоқ врачлик пункти ва оилавий поликлиникаларга жалб қилиш зарурлигини таъкидлади.
Бунинг учун чекка ҳудудлардаги бирламчи бўғин тиббиёт тизими учун «Қишлоқ шифокори» дастури жорий қилинади. Бу дастурга мувофиқ чекка ҳудудлардаги бирламчи бўғинга ишга кирган тиббиёт ходимларига 30 миллион сўм миқдорида бир марталик пул маблағи берилади, улар хизмат уйи билан таъминланади ёки ижара тўлови компенсация қилинади. Шу билан бирга уларга икки йилда бир маротаба сиҳатгоҳга бепул йўлланма берилади.
Шифокорларга бўлган эҳтиёжларни маҳаллалар кесимида аниқлаб, тиббиёт олий ўқув юртларида квотани ошириш, ипотека асосида қурилаётган уй-жойларни аввало бирламчи бўғин шифокорлари учун ажратиш бўйича кўрсатмалар берилди.
Селекторда айтилишича, ЖССТ томонидан битта амалиёт шифокорига 1,5 минг нафар фуқаро бириктирилиши тавсия этилган. Ўзбекистондаги оилавий поликлиникаларга ўртача 25-30 минг нафар фуқаро тўғри келиши лозим бўлса-да, бироқ амалда 40 минг нафардан 100 минг нафаргача фуқаро тўғри келмоқда.
Таъкидланишича аҳоли эҳтиёжидан келиб чиқиб, келгуси йилда Ўзбекистонда 100 та қишлоқ врачлик пункти ва 24 та оилавий поликлиника ташкил этилади. Бунга қўшимча равишда кейинги 2 йилда яна 215 та Қишлоқ врачлик пункти ва 61 та оилавий поликлиника фаолияти йўлга қўйилади.
Изоҳ (0)