Дунёда коронавирусга чалиниш ҳолатлари бўйича ҳафталик антирекорд қайд этилди

Ўтган бир ҳафта ичида бутун дунё бўйлаб яна 3,3 миллиондан ортиқ одамда коронавирус инфекцияси аниқланган. Бу ҳақда Жаҳон соғлиқни сақлаш ташкилотининг ҳафталик ҳисоботига таяниб, «РБК» хабар берди.

Таъкидланишича, бу пандемия бошланганидан буён қайд этилган энг юқори кўрсаткич ҳисобланади. Бир ҳафта давомида дунёда 45 мингдан ортиқ одам коронавирус оқибатида вафот этган.

Маълумотларга кўра, бутун дунёда коронавирусга чалинганлар сони 47 миллион кишидан ошган.

ЖССТ бутун дунёда бир ҳафта ичида касалликка чалиниш бўйича ҳафталик рекордни бундан олдин 19—25 октябрда қайд этганди — 2,8 миллиондан ортиқ.

ЖССТнинг қайд этишича, 26 октябрдан 1 ноябрга қадар касалликка чалиниш ҳолатларининг асосий қисми Европа минтақасига тўғри келмоқда (1,7 миллиондан ортиқ). Шунда қилиб, минтақадаги касалланиш даражаси ундан олдинги ҳафтага нисбатан 22 фоизга ошган.

Бир ҳафта ичида касалланиш ҳолатлари асосан Франция (275 866), Италия (174 921) ва Буюк Британияда (157 650) аниқланган.

Аввалроқ ЖССТ яқин бир неча ойда дунёда COVID-19 коронавирус тарқалиши билан боғлиқ вазият жуда оғирлашишидан огоҳлантирган эди.