Франция полицияси Парижнинг марказий қисмидаги Пер-Лашез туманида мачете кўтариб юрган эркакни ҳибсга олди, деб хабар бермоқда Reuters’га таяниб Meduza.
Шахси аниқланмаган эркак меҳмонхонадаги хонасида ҳибсга олинган. Полиция вакили ҳибсга олинган кишининг хатти-ҳаракатларидан кимдир зарар кўрганлиги ёки йўқлиги ҳали маълум эмаслигини таъкидлади.
Париждаги Actu Paris нашри ўз манбасига иқтибос келтирган ҳолда хабар беришича, соат 11:30 атрофида (Тошкент вақти билан 15:30) бир неча киши Пер-Лашез метро станциясида мачете кўтарган одамни кўрган.
Полиция қўлга олиш ишларини метро бекатидан бир неча ўн метр нарида жойлашган Шемен Вер кўчасида амалга оширди. Ҳибсга олиш вақтида кўча ёпилган, дўконлар тўхтатилган. Соат 12:30 да (Тошкент вақти билан 16:30 да) кўчада транспорт ҳаракати тикланган.
Қайд этилишича, октябрь ойида Франциянинг турли шаҳарларида содир бўлган қатор ҳужумлардан сўнг маҳаллий ҳокимият хавфсизлик чораларини кучайтирган.
https://twitter.com/loran076/status/1323588751898062848
Эслатиб ўтамиз, 29 октябрь куни Франциянинг Ницца шаҳридаги Нотр-Дам ибодатхонасида қуролланган эркак одамларга ҳужум қилиб, уч кишини ўлдирди. Жиноятчи 21 ёшли тунислик бўлиб чиқди. Кейинчалик ушбу терактни ўз зиммасига олган тунислик эркак ҳам ҳибсга олинди. Франция ҳукумати Ниццадаги ҳужумни теракт деб баҳолади. мамлакатда террористик хавфнинг энг юқори даражаси эълон қилинди.
29 октябрнинг ўзида Франциянинг Авиньон шаҳрида пичоқ билан қуролланган эркак «Аллоҳу акбар» деб қичқириб, полициячиларга ҳужум қилишга уринган. Полициячилар ўт очган ва ҳужум қилган эркакни ўлдирган. Деярли бир вақтда Саудия Арабистонининг Жидда шаҳрида Франция консуллигига ҳужум уюштирилган, консуллик қўриқчиси жароҳат олган. Ҳужум қилган эркак қўлга олинган. Бундан ташқари, Францияда Лион шаҳрида ҳам содир бўлиши мумкин бўлган яна бир тажовузкор ҳаракатнинг олди олинган.
Шунингдек, 30 октябрда Париж шаҳрида қуролланган эркак полициячиларга ҳужум қилишга урингани хабар қилинди.
Шу билан бирга, 2 ноябрь куни Австриянинг пойтахти Вена шаҳри марказида бир гуруҳ террорчи ҳужум уюштирди. Натижада тўрт кишини ўлдирди ва 17 киши яраланди. Кейинчалик Венадаги ҳужумни ИШИД террорчилик гуруҳи тарафдори содир этгани маълум қилинди.
Изоҳ (0)