Россияда 3 ноябрь тонгги ҳолатига кўра, коронавирусга чалиниш бўйича 18 648 та янги ҳолат қайд этилди, деб хабар бермоқда Meduza. Бир кун аввал 18 257 кишида COVID-19 аниқланганди.
Энг кўп касалланганлар Москва (+5150) ва Санкт-Петербург (+944) ва Москва вилоятида (+567) аниқланган.
Кунлик касалланиш бўйича энг юқори кўрсаткич — 18 665 та ҳолат 1 ноябрь куни қайд этилганди. Мамлакатда касалланганларнинг умумий сони 1 673 686 кишига етди.
Сутка давомида инфекциядан 355 киши, эпидемия бошланганидан буён эса 28 828 киши вафот этган. Соғайганлар сони 1 251 364 нафарни ташкил этмоқда, шулардан 15 331 нафари сўнгги бир кеча-кундузда тузалиб чиққан.
Мамлакатда коронавирусни аниқлаш бўйича сўнгги 24 соат давомида 412 мингта, умумий ҳисобда эса 61,9 миллиондан ортиқ тест ўтказилган.
Россияда касалланганлар сони ошаётганига қарамай, ҳукумат мамлакатда коронавирус тарқалиши туфайли қатъий чекловларни жорий қилишни режалаштирмаяпти. Шунга қарамай, мамлакат аҳолиси янги карантиндан қўрқиб, маҳсулотларни ғамлаб қўя бошлади.
Изоҳ (0)