Наманганлик фуқарога билет олиб беришини айтиб, уни 450 долларга чув туширган бухоролик аёлга жиноят иши қўзғатилди

Наманганлик фуқарони чув туширган бухоролик аёлнинг фирибгарлиги фош этилди. Бу ҳақда «Дарё»га вилоят ИИБ ахборот хизмати маълум қилди.

Таъкидланишича, 2020 йилнинг сентябрь ойида Бухоро шаҳрида яшовчи 33 ёшли аёл М.К. интернет тармоғидаги «Золотоя корона» сайти орқали Россияда вақтинча ишлаб келаётган 21 ёшли наманганлик фуқаро Ж.А.дан 450 доллар пул олган ва эвазига унга Россиядан Ўзбекистонга қайтиб келиши учун чипта олиб беришини ваъда қилган.

Бироқ орадан икки ойлар ўтгач фуқаро Ж.А. алданиб қолганини тушуниб етган ва иш бўйича Бухоро шаҳар Ички ишлар органлари фаолиятини мувофиқлаштириш бошқармасига мурожаат қилган.

Мазкур ҳолат юзасидан Бухоро шаҳар Ички ишлар органлари фаолиятини мувофиқлаштириш бошқармаси 3-сон Ички ишлар бўлими ҳузуридаги тергов гуруҳи томонидан тезкор суриштирув ишлари олиб борилиб, М.К.нинг фирибгарлиги фош этилган. Унга нисбатан Жиноят кодексининг 168-моддаси 3-қисми (фирибгарлик) «б» банди билан жиноят иши қўзғатилган.

«Фуқароларимиздан ўзганинг мулкини жиноий йўл билан эгаллаш мақсадини кўзлаб, турли ижтимоий тармоқлар орқали эълон қилинаётган ютуқли ўйинлар, турли хилдаги акциялар, электрон савдолар ва шу кабиларга алданиб қолмасликларини сўраб қоламиз», — дейди Шуҳрат Жалолов.

Ҳозирги кунда фуқаро М.К.га нисбатан тергов ҳаракатлари давом эттирилмоқда.