Чехия сўнгги етти кун ичида коронавирус оқибатида вафот этганлар сони (ҳар 100 минг кишига нисбатан ҳисобда) бўйича дунёда биринчи ўринга чиқиб олди, деб хабар бермоқда «РБК».
Европа касалликлар профилактикаси ва назорати маркази (ECDC) маълумотларига кўра, ўтган ҳафта мобайнида бу кўрсаткич Чехияда 11,02 қийматига етган. Мамлакат Андоррани ортда қолдирган, у ерда, ECDC ахборотига кўра, бир ҳафтада ҳар 100 минг аҳолига 7,88 киши вафот этган. Учинчи ўринни Бельгия (6,81), тўртинчи ўринни Арманистон (6,19) эгаллади. Юқори бешликка Черногория ҳам кирди (6,11).
Ўтган бир кеча-кундузда Чехияда 11,4 минг кишида коронавирус аниқланди. Пандемия бошидан буён касалликка чалинганлар сони мамлакатда 335 минг кишидан ошди, шулардан 3,2 минг нафари вафот этди. Чехия аҳолиси сони 10,6 миллион кишига тенг.
28 октябрдан мамлакатда ССВ қарори билан кечаси комендантлик соати жорий қилинган.
Чехияда 5 октябрдан COVID-19 билан боғлиқ вазиятнинг ёмонлашуви сабабли 30 кунга фавқулодда ҳолат режими жорий қилинганди.
Мамлакат Соғлиқни сақлаш вазирлиги инфекциянинг юқори даражаси бир-икки ҳафта давомида сақланиб қолади ва кейинчалик қатъий чеклов чоралари туфайли камаяди, деб ҳисоблайди. Мутахассисларнинг фикрича, агар чора-тадбирлар натижа бермаса, ой охирига бориб касалланганлар сони чорак миллионга етиши мумкин.
Изоҳ (0)