Туркия ғарбидаги Измир вилоятида юз берган зилзила оқибатида турар жой биноларининг вайроналари остида қолиб кетган 3 ёшли қизалоқ 65 соатдан сўнг қутқариб олинди, деб хабар беради Anadolu.
Таъкидланишича, қизча яқин атрофдаги шифохоналардан бирига ётқизилган. Уч ёшли Элиф Перинчекнинг яқинлари унинг қутқариб олинишини мўъжиза деб атаган. Ҳозирга қадар мамлакатда қутқарувчилар томонидан вайроналар остидан чиқариб олинганлар сони 106 кишига етди.
Аввалроқ Измирдаги вайроналар остида қолиб келган эркак 33 соатдан сўнг қутқариб олингани маълум бўлганди.
Anadolu агентлиги томонидан эълон қилинган видеода қутқарувчилар аввалига вайроналарни тозалаётгани шундан сўнг, жабрланган эркакни тез ёрдам каретасида олиб кетаётгани тасвирланган.
Сўнгги маълумотларга кўра, Туркия ғарбида содир бўлган зилзила қурбонлари сони 83 кишига етган. «РИА Новости»нинг мамлакат Фавқулодда вазиятлар ва табиий офатлар агентлигига таяниб ёзишича, жароҳатлар олганлар сони ҳозирда 962 кишини ташкил этмоқда, уларнинг 219 нафари шифохоналарда даволаняпти.
Эслатиб ўтамиз, зилзила 30 октябрь куни тушдан кейин Туркиянинг ғарбий қисмида содир бўлган, унинг кучи 6,6 баллни ташкил этганди. Зилзила эпимаркази Эгей денгизида, Измир вилоятининг Сефериҳисар шаҳри яқинида бўлган.
Ер силкиниши кучи Греция оролларида ҳам сезилган. Грек сейсмологлари унинг кучини 6,9 балл деб баҳолади. Зилзила оқибатида Грециянинг Самос оролида икки киши ҳалок бўлди, 20 киши жароҳат олди. Оролда 6 ойлик фавқулодда ҳолат эълон қилинди.
Изоҳ (0)