Макрон: Карикатураларни қўллаб-қувватламадим, менинг сўзларим нотўғри талқин қилинди

Франция президенти Эмманюэль Макрон Муҳаммад пайғамбар (с.а.в.) карикатуралари туфайли мусулмонларда пайдо бўлган ҳис-туйғуларни тушунишини айтди, аммо уларни ҳукумат эмас, мустақил ОАВлар чиқараётганини таъкидлади, деб ёзади «РБК». Бу ҳақда у Al Jazeera телеканалига берган интервьюсида маълум қилди.

«Мен бундай ҳиссиётларни тушунаман ва уларни ҳурмат қиламан. Бироқ сиз менинг ролим нимадан иборат эканлигини тушунишингиз керак, у иккита нарсани: ҳуқуқий тартибни ва ҳуқуқлар ҳимоясини таъминлаши керак», — деди президент. У ўз мамлакатида «гапириш, ёзиш, ўйлаш, чизиш» учун ҳуқуқларни доим ҳимоя қилишини қўшиб қўйди.

Макрон мусулмонларнинг унга нисбатан танқиди унинг сўзлари нотўғри талқин қилиниши билан боғлиқлигини тахмин қилди. «Фикримча, юзага келган муносабат менинг сўзларим нотўғри талқин қилиниши ва ёлғон оқибати бўлди, чунки одамлар бундан мен расмларни қўллаб-қувватлаганимни тушунди», — деди у. Президент Муҳаммад пайғамбар (с.а.в.) карикатуралари «ҳукумат лойиҳаси» эмаслигини, балки ҳукуматга алоқадор бўлмаган эркин ва мустақил ОАВлар фаолияти натижаси эканлигини айтди.

Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эмманюэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.

Макрон бу қотилликни «Ислом террорчилигига хос хатти-ҳаракат» деб атади. У, шунингдек, Ислом дини «бутун дунёда инқироз ҳолатини бошдан кечираётгани» ҳақида фикр билдирди.

Макроннинг бу гаплари кўплаб давлатларда мусулмонларнинг ғазабига сабаб бўлди. Улар Франция ва Макронга қарши норозиликлар билдира бошлади. Баъзи намойишчилар Франция байроғи ва Макроннинг суратларини топтаган. Бундай норозилик акциялари Покистон, Ливан, Туркия, Фаластин ва бошқа давлатларда бўлиб ўтди.