Туркия ғарбида юз берган зилзила оқибатида ҳалок бўлганлар сони 51 кишига етди. «РБК»нинг Sözcü ва TRT Haber’га таяниб хабар беришича, бу ҳақда республика фавқулодда ҳолатлар ва табиий офатлар агентлиги маълум қилди.
Сўнгги маълумотларга кўра, зилзиладан 896 киши жабрланган. Уларнинг 682 нафари шифохоналардан чиқарилган, қолган, 214 нафари даволанишда давом этмоқда.
Зилзила 30 октябрь куни тушдан кейин Туркиянинг ғарбий қисмида содир бўлган, унинг кучи 6,6 баллни ташкил этганди. Зилзила эпимаркази Эгей денгизида, Измир вилоятининг Сефериҳисар шаҳри яқинида бўлган.
Ер силкиниши кучи Греция оролларида ҳам сезилган. Грек сейсмологлари унинг кучини 6,9 балл деб баҳолади. Зилзила оқибатида Грециянинг Самос оролида икки киши ҳалок бўлди, 20 киши жароҳат олди. Оролда 6 ойлик фавқулодда ҳолат эълон қилинди.
Зилзилада ҳалок бўлган ёки жароҳат олганлар орасида Ўзбекистон фуқаролари йўқлиги маълум қилинган. Шунингдек, Президент Шавкат Мирзиёев Туркияда юз берган зилзила сабабли Ражаб Тоййиб Эрдўғонга ҳамдардлик билдирган.
Изоҳ (0)