Португалияда коронавирус билан касалланиш ҳолати ортгани сабаб аҳолининг мамлакат бўйлаб ҳаракатланиши тақиқланди. Ушбу тақиққа беш кун давомида амал қилинади, деб хабар беради Reuters.
Маълум қилинишича, ҳаракатланишга қўйилган беш кунлик тақиқни бузганларни тўхтатиш учун бутун мамлакат бўйлаб назорат-ўтказиш пунктлари ўрнатилган.
«Португалиядаги 300 дан ортиқ муниципалитет орасида ҳаракатланиш 30 октябрдан 3 ноябрга қадар тақиқланди. Ҳукумат шу орқали коронавируснинг Авлиёлар миллий байрами вақтида тарқалиш эҳтимоллигини камайтиришга уринмоқда», — дейилади хабарда.
10 миллиондан ортиқ аҳолига эга бўлган Португалияда пандемия бошланганидан буён 137 мингдан ортиқ одамда коронавирус аниқланган ва ҳозирга қадар 2468 киши COVID-19 қурбонига айланган. 30 октябрнинг ўзида яна 4656 кишида вирус аниқланган бўлиб, бу мамлакат учун кунлик рекорд кўрсаткич ҳисобланади.
Аввалроқ Норвегия, Франция ва Украинада карантин чоралари кучайтирилгани тўғрисида хабар берилганди.
Изоҳ (0)