«Ҳамма қўлини кўтарсин, сиздан печенье». АҚШда икки енот банкни ўмаришга уринди
Бир неча кун аввал АҚШнинг Редвуд шаҳридаги банклардан бирида икки нафар енот қўлга олинди.
Маълум қилинишича банкоматдан пул ечаётган эркак енотни офис ичида бодомли печенье қутисига қўл чўзаётганини кўриб қолган ва шу заҳоти мутахассисларни чақирган.
Етиб келган жониворларни ҳимоя қилувчи ташкилот вакиллари безори ҳайвонларни тутишга муваффақ бўлган.
«Ҳар куни ҳам банкдаги безориликни тартибга солиш учун ташкилотимизга мурожаат қилаверилмайди. Менежерлар қутқарувчиларни бинога киритгач, енотларни 10 дақиқа таъқиб қилдик ва ниҳоят зарар етказмаган ҳолда уларни кўчага қувиб чиқардик. Аммо улар бинони тарк этишни истамади», — дейди ҳайвон ҳимоячиси Баффи Мартин.
Дарҳақиқат, банк енотларга ёқиб қолган, улар бир лаҳзада кичик панжаралари билан қоғозларни сочган, техникаларга зарар етказган ва егуликлар сақланадиган қути ҳамда идишларни ёйиб ташлаган. Аммо ҳеч нарса олиб чиқиб кетилмаган.
Жониворларни ҳимоя қилувчи ташкилот вакилларининг айтишича, енотлар ёпиқ бино ичига томдан тушган.
«Дарахтда кир панжа излари борлигига гувоҳ бўлдик. Шу сабаб ҳайвонлар биринчи дарахтга ва у орқали томга чиққан деб, тахмин қилмоқдамиз. Кейин нимадир қилиб ҳаво вентиляция каналларига кириб қолган ва шифт плиталари орқали ерга йиқилган», — деб қўшимча қилади Баффи.
