Британиянг Суонси округида жойлашган қишлоқлардан бирида истиқомат қилувчи оила саккиз йил олдин йўқолиб қолган мушуги билан қайта топишди, деб хабар беради Euro Weekly News.
Бундан ўн йиллар олдин Харрислар оиласи Мо лақабли қора мушукни боқиш учун олган. 2012 йилда мушук кўчадан уйга қайтиб келмаган. Унинг эгалари ёмон хаёлларга бормай, мушукни кимдир олиб кетган деган гумонга борган.
Маълум бўлишича, ўтган вақт давомида Мо Ллансамлет туманидаги одамнинг уйида бошқа мушуклар билан бирга яшаб келган. Энг сўнгги эгаси вафот этган ва уй ҳайвонларини унинг қўшниси вақти-вақти билан овқатлантириб турган. Охир-оқибат у ҳайвонларга нисбатан шафқатсиз муносабатларнинг олдини олиш бўйича Қироллик ҳамжамияти ходимларига мурожаат қилган.
Ҳайвон ҳимоячиси бўлган Паула Милтон мушукларни олиб кетгани келганида уларнинг бирига микрочип ўрнатилганини пайқаб қолган. Чип орқали у Харрислар оиласи билан боғланган.
«Бу ҳайвонларни қутқариш бўйича фаолиятим давомидаги энг яхши вазифаларимдан бири бўлди», — дейди Милтон.
«Тўғрисини айтганда, биз шокда эдик. Ҳайвонлар узоқ йиллардан сўнг эгасининг олдига қайтиб келганини эшитасан, бироқ сен билан ҳам шу нарса содир бўлишини ҳеч кутмайсан. Унинг қайтгани зўр бўлди ва ҳайвонларга ёрдам беришга тайёр яхши инсонлар борлигини билиш ҳам жуда ёқимли. Мо шунча йил давомида хавфсизликда бўлган», — дейди Иззи Харрис.
Аввалроқ АҚШда эски уйини соғинган ит бир штатдан бошқасига 90 километр йўл босиб боргани тўғрисида хабар берилганди.
Изоҳ (0)