Тошкент шаҳри ва вилоятида доимий рўйхатдан ўтишни онлайн расмийлаштириш имконияти яратилди. Ушбу хизмат Миграция ва фуқароликни расмийлаштириш бўлимига (паспорт идорасига) бормасдан прописка олиш имкониятини беради.
Бунинг учун фуқаролар Ягона порталдаги (my.gov.uz) «Фуқаролик» туркумига ўтиши лозим. Хизмат орқали кўчмас мулк объектига эгалик ҳуқуқи бир шахсга тегишли бўлган объектларга доимий рўйхатга туриш мумкин.
Хизматдан қуйидаги тоифалардаги фуқаролар фойдаланиши мумкин:
- Қонун ҳужжатларига мувофиқ олинган уй-жойга эга бўлган Ўзбекистон фуқаролари — хусусий мулк қилиб олинган уй-жойга.
- Тошкент шаҳрида доимий яшаш жойи бўйича рўйхатга олинган фуқаролар — улар Тошкент шаҳри ва Тошкент вилоятида бошқа манзилга доимий яшаш жойи бўйича рўйхатга олиниш масаласи юзасидан мурожаат этган тақдирда.
- Тошкент вилоятида доимий яшаш жойи бўйича рўйхатга олинган фуқаролар — улар Тошкент вилоятида бошқа манзилга доимий яшаш жойи бўйича рўйхатга олиниш масаласи юзасидан мурожаат этган тақдирда.
Эслатиб ўтамиз, 2020 йил 21 апрелда Президент Тошкент шаҳри ва вилоятига доимий прописка қилишни соддалаштириш ҳақидаги фармонни имзолаган. 29 апрелда эса Қонунчилик палатаси депутатлари прописка тизимини ислоҳ қилиш тўғрисидаги қонунни маъқуллаган, 12 май куни сенаторлар прописка тизимига киритиладиган ўзгаришларни маъқуллаган. Шавкат Мирзиёев мазкур қонунни 13 май куни имзолади.
Мавзуга доир: «Барчанинг пойтахтда яшашга ҳақи бор» — Шавкат Мирзиёев
Изоҳ (0)