Сирдарё вилоятида юз берган техноген фалокат оқибатида Мирзаобод, Оқолтин ва Сардоба туманидаги ўндан зиёд мактаб ва мактаб филиали жиддий зарар кўрган. Давлат бюджетидан ажратилган 51 миллиард 300 миллион сўм маблағ эвазига қисқа вақт ичида барча таълим масканлари қайта таъмирланиб, ўқув йили анъанавий тарзда бошланди. Бу ҳақда 29 октябрь куни вилоятга уюштирилган пресс-тур давомида маълум қилинди.
Тадбир давомида Олий Мажлис Қонунчилик палатаси депутатлари ҳамда журналистлар Мирзаобод туманидаги замонавий қиёфага кирган 17-умумтаълим мактабида бўлишди.
ОАВ вакилларига интервью берган халқ таълими вазири Шерзод Шерматовнинг айтишича, учала тумандаги 17 та мактабда қурилиш-таъмирлаш ишлари олиб борилган. Битта мактаб янгидан барпо этилган бўлса, яна бирида қўшимча объект қурилган.
«Очиғини айтиш керак, мазкур туманлардаги мактаблар ўн йиллаб давлат дастурига киритилмаган эди, жуда оғир ҳолатда бўлган. Бирортасида оптик толали интернет ҳам йўқ эди. 3-4 ой давомида ҳамма мактаб мукаммал таъмирланиб, тўлиқ жиҳозланди. Барчасига оптик толали интернет олиб кирилди, замонавий компьютер жиҳозлари қўйилди. Эндиги вазифамиз ушбу муассасаларда таълим бериш сифатини ошириш. Ўқувчиларга чет тиллари ва ахборот технологияларини яхши ўргатишга кўпроқ аҳамият қаратмоқчимиз. Чунки болалар уйда ўтириб ҳам мустақил тарзда даромад топиш имконига эга бўлсин.
Кадрлар тайёрлаш масаласи ҳам эътиборимизда. Вилоят малака ошириш марказининг филиалини очиш ҳаракатидамиз», — деди Шерматов, дея унинг сўзларини келтирмоқда «Дарё» мухбири Миролим Исажонов.
Изоҳ (0)