Наманганда тутзорнинг бир қисми эрининг укасига бериб юборилганидан норози аёл ўзи ва икки нафар фарзандини сувга чўктирди. Бу ҳақда Бош прокуратура матбуот хизмати хабар берди.
Маълум қилинишича, 26 октябрь куни соат 17:00 ларда Янгиқўрғон тумани «Навкент» маҳалласида яшовчи 36 ёшли аёл шаръий никоҳдаги турмуш ўртоғининг оиласига тегишли бўлган икки гектар тутзор учун ажратилган ер майдонининг 50 сотихи укасига бериб юборганлигидан норози бўлиб, бу ҳақида хат ёзиб қолдирган.
Сўнг икки нафар вояга етмаган фарзанди билан тумандаги «Янгиқўрғон эски ер» сув омборига келиб, омборнинг бошланиш қисмига фарзандларини кетма-кет сувга ташлаб, уларни чўкиб ўлганлигига ишонч ҳосил қилгандан сўнг ўзини ҳам сувга ташлаб, жонига қасд қилган.
Мазкур ҳолат юзасидан Наманган вилояти прокуратураси томонидан Жиноят кодексининг 97-моддаси (қасддан одам ўлдириш) 2-қисми «а» банди билан жиноят иши қўзғатилган.
Ҳозирда тергов ҳаракатлари олиб борилмоқда.
Эслатиб ўтамиз, шу йилнинг июнь ўрталарида Наманганда ота хотини ва уч фарзандини болта билан чопиб, сўнг ўзини ёқиб юборгани тўғрисида хабар берилганди.
Изоҳ (0)