Франциянинг Лион шаҳрида афғонча либос кийган, қуролланган шахс қўлга олинди. Бу ҳақда «Интерфакс» хабар қилган.
«Гумонланувчининг 30 сантиметрли пичоғи бор эди ва у ҳужумга шайланган бўлиши мумкин», – деган Лион иккинчи округи мери Пьер Оливье.
Қайд этилишича, айни вақтда гумондор сўроқ қилинмоқда ва суриштирувлардан кейин тиббий психиатрик текширувларга юборилади.
Аввал Франциянинг Ницца шаҳрида пичоқ кўтарган эркак Нотр-Дам базиликаси меҳмонларига ҳужум қилган ва уч кишини пичоқлаб ўлдиргани, Авинён коммунасида пичоқ кўтарган эркак полициячиларга ҳужум уюштиргани, оқибатда ҳуқуқ-тартибот идораларининг ходимлари уни отиб ташлагани ҳақида хабарлар берилган. Кейинчалик Ниццада теракт содир этган шахс Тунис фуқароси – 21 ёшли Браҳим А. эканлиги ва унинг шерикларсиз ҳаракат қилгани маълум бўлган.
Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.
2019 йилнинг октябрь ойида пичоқ билан қуролланган шахс мамлакат пойтахти Париждаги марказий полиция идорасида тўрт нафар полиция зобитини пичоқлаб ўлдирган, кейинчалик қотилнинг бошқаларга хавф соладиган хулқ-атвор эгаси бўлмаганлиги, кар-соқов бўлгани, мудҳиш воқеага ходимлар ўртасида низо чиқиши сабаб экани тахмин қилинганди. Воқеадан кейин Франция Республикачилар фракцияси раҳбари Кристиан Якоб Париждаги полиция штаб-квартирасида юз берган 4 нафар полициячининг ўлдирилиши сабаб парламентда бу иш бўйича тергов комиссиясини тузишни таклиф этиб, ўша вақтдаги Франция ички ишлар вазири Кристоф Кастанернинг истеъфосини талаб қилган.
2020 йил январь ойида эса Париж яқинидаги Вилжюиф шаҳарчасида пичоқ билан қуролланган киши йўловчиларга ҳужум уюштирган, қуролли ҳужум От-Брюер паркида амалга оширилганди. Ҳужум оқибатида тўрт нафар одам жароҳатланган, улардан бири воқеа жойида ҳалок бўлган. Ҳужум уюштирган қотил воқеа жойига етиб келган полициячилар томонидан отиб ўлдирилган. Кейинчалик, эркакнинг исми Натан экани ва унинг руҳий касалликка чалинган бемор бўлгани тахмин қилинганди.
Изоҳ (0)