Тошкентдаги Адиблар хиёбонида ўрнатилган Огаҳий, Бердақ, Муқимий, Фурқат, Маҳмудхўжа Беҳбудий, Тўлепберген Қайипбергенов, Александр Файнбергнинг гипсдан ясалган ҳайкаллари бронзага алмаштирилмоқда. Бу ҳақда Ўзбекистон Ёзувчилар уюшмаси ахборот хизмати раҳбари хабар берди.
Қайд этилишича, ноябрь ойида Абдулла Қодирий, Чўлпон, Абдулла Авлоний, Ибройим Юсупов сингари ёзувчи-шоирларнинг гипсдан ишланган ҳайкаллари бронзага ўзгартирилади. Ўзбек адабиётининг атоқли намояндаларидан бири, машҳур шоир, забардаст драматург, адабиётшунос олим ва таржимон Мақсуд Шайхзодага эса биратўла бронзадан ҳайкал ўрнатилади.
«Масалан, Муқумийнинг бронзадан ишланган ҳайкали 2,5 тонна. Уни 20 нафарли жамоа бошқа ҳайкаллар билан биргаликда бир ой давомида ишладик. Мен уларнинг техник томонларига ёрдам бераман. Ушбу ёдгорликлар асраб-авайланса, ҳадеб силлиқланавермаса (шлифовка) асрлар давомида сақланади», – дейди ҳайкалтарош, Камолиддин Беҳзод номидаги Миллий рассомлик ва дизайн институти талабаси Жавлон Анназаров ёдгорлик ўрнатилаётган маҳал.
Миллий боғ ҳудудида Адиблар хиёбонини ташкил этиш ҳақидаги қарор Ўзбекистон Президенти Шавкат Мирзиёев томонидан 2017 йил 18 апрель куни имзоланган эди. Қарорга мувофиқ, Ҳамид Олимжон, Ғафур Ғулом ва Зулфия ҳайкаллари Адиблар хиёбонига кўчирилиши, бундан ташқари Озод Шарафиддинов, Эркин Воҳидов, Абдулла Орипов, Муҳаммад Юсуф шарафига янги ҳайкаллар ўрнатилиши кўзда тутилган эди.
Қайд этиш жоиз, 1991 йили Миллий боғ ҳудудида шоир ва мутафаккир Алишер Навоийнинг ҳайкали барпо этилган. Кейинчалик боғнинг алоҳида бир қисмида Ўзбекистон халқ ёзувчилари Абдулла Қаҳҳор (2007), Ойбек (2010), Саид Аҳмад (2010) ва шоира Саида Зуннунова (2013) ҳайкаллари кетма-кет ўрнатилган. 2017 йилда эса Зулфия, Ҳамид Олимжон ва Ғафур Ғулом ҳайкали боғга кўчирилганди.
Изоҳ (0)