Beeline Uzbekistan бош директори Сергей Афонин эгаллаб турган лавозимидан кетишга ва ўз карьера йўлини VEON компанияси гуруҳидан ташқарида давом эттиришга қарор қилди. Бу ҳақда компания матбуот хизматига таяниб, Spot хабар берди.
Афонин бош директорликдан кетишини оилавий шароити ва глобал пандемия даврида сафарларнинг чеклангани билан изоҳлаган.
«Афонин раҳбарлиги остида бир қатор йирик ва стратегик жиҳатдан муҳим ташаббуслар муваффақиятли ишга туширилди ва амалга оширилди, хусусан, кўплаб янги тариф ҳамда хизматлар жорий этилди. 2020 йилнинг сўнгги 10 ойининг ўзида бутун республика бўйлаб 2000 дан ортиқ базавий станциялар қурилди ва алоқа мамлакатнинг энг чекка бурчакларида ҳам ишлай бошлади», — дейилади матбуот хизмати хабарида.
Айни вақтда VEON компанияси Beeline Uzbekistan бош директорлиги лавозимига янги номзодни қидирмоқда. Таъкидланишича, муносиб номзодни топиш, шунингдек, ўзидан кейинги компания етакчисига вазифаларни тушунтириш жараёнида Сергей Афониннинг шахсан ўзи ҳам иштирок этади.
Эслатиб ўтамиз, VEON Group Сергей Афонинни 2019 йил 1 мартдан Beeline Uzbekistan бош директори лавозимига тайинлаган эди. Бунга қадар у Beeline Russia Жанубий минтақавий филиали директори, Россиядаги йирик FMCG-компания тижорий директори лавозимларида ишлаган.
Изоҳ (0)