28 октябрь куни Олий Мажлис Қонунчилик палатасида давлат дастурининг 3-чоракда бажарилиши юзасидан ҳукумат ҳисоботи эшитилди. Унда бош вазир ўринбосари, Туризмни ривожлантириш давлат қўмитаси раиси Азиз Абдуҳакимов мамлакатда туризмни тиклаш режаларига тўхталиб ўтган, деб хабар беради «Kun.uz».
«Январь—февраль ойларида бутун дунё бўйича оммавий эмлаш бошланади. Бу ишлар кейинги йилнинг учинчи—тўртинчи чорагига бориб якунланади. Демак, туризм ҳам шу пайтга келиб тиклана бошлайди. Халқаро ташкилотлар ва халқаро экспертларнинг ҳисоб-китобларига кўра, эмлаш якунланишига туризмда ўсиш бошланади», – дея таъкидлаган бош вазир ўринбосари.
Унинг қайд этишича, Ўзбекистонда ҳам туризм тикланишига тайёргарлик кўриб борилиши керак. Шунинг учун ҳозир рейсларни кўпайтириш, арзон лоукостерларни Ўзбекистонга жалб қилиш бўйича Транспорт вазирлиги билан ҳамкорликда ишланмоқда.
«Иккинчи йўналиш – ички туризм бўйича ҳам тиклаш ишлари олиб борилмоқда. Чекловлар юмшатилгач, санаторийлар, болалар оромгоҳлари ўз фаолиятини тиклади. Ички туризм ҳозир яхши ривожланиб бормоқда.
Умуман олганда, ҳозирги кунда туризмни тиклаш учун имкон даражасида тайёргарлик ишлари олиб борилмоқда. Тайёргарлик нафақат Тошкент, Самарқанд ва Бухоро каби йирик шаҳарларда, балки бошқа вилоятларда ҳам бошланган», – дейди Азиз Абдуҳакимов.
Аввалроқ Uzbekistan Airways компанияси бошқаруви раисининг биринчи ўринбосари Умид Ҳусанов ҳозирда лоукостер (чипта баҳоси арзон) авиакомпанияни ташкил этишни режалаштирмаётганини маълум қилганди. У Uzbekistan Airways авиакомпаниясини ривожлантириш бўйича стратегиясида ҳам лоукостерларни ташкил этиш режаси йўқлигини билдирган.
Ўзбекистонда лоукостерлар ташкил этилиши мумкинлиги ҳақидаги дастлабки гап-сўзлар 2018 йил бошида, Қозоғистоннинг Ақтўбе вилоятида 52 нафар ўзбекистонлик меҳнат муҳожири носоз автобусда тириклайин ёниб кетганидан сўнг кўтарилган эди. Ўшанда Умид Ҳусанов бундай авиакомпания 2018 йил охиригача ташкил этилиши, унда Тошкентдан Москвага 100 долларга учиб бориш мумкин бўлишини таъкидлаб ўтган эди.
2020 йил бошида бош вазир Абдулла Арипов Humo Air авиакомпанияси ташкил этилишини эълон қилганди. Ҳукумат раҳбарининг сўзларига кўра, 2020 йилда ташкил этилиши керак бўлган бу авиакомпания «аввалига республика ичида паст нархда мунтазам авиарейсларни» амалга ошириши керак эди. Кейинчалик «Махсус авиация хизматлари» авиакомпанияси ихтиёридаги 43 та Ан-2 самолётлари Humo Air’га берилиши ҳақида хабарлар пайдо бўлди.
Шунингдек, 2020 йилги Давлат дастурига бешта янги авиакомпания ташкил этиш ҳам киритилган эди. Умуман, мамлакатда авиакомпаниялар сони кўпайиши ҳақида 2018 йилда бош вазир биринчи ўринбосари Очилбой Раматов, 2020 йилда бош вазир ўринбосари Азиз Абдуҳакимов, транспорт вазири Элёр Ғаниев ҳам гапирган. Бироқ амалда «Ўзбекистон ҳаво йўллари»ни Uzbekistan Airways, Uzbekistan Airports ва Uzbekistan Helicopters’га бўлишдан бошқа иш бўлмади.
Изоҳ (0)