Наманган вилояти ҳокимига икки маслаҳатчи тайинланди

Наманган вилояти ҳокими Шавкатжон Абдураззоқовга икки маслаҳатчи тайинланди. Бу ҳақда «Дарё» мухбири Азизбек Абдувалиев хабар бермоқда.

Ботиржон Нуриддинов Наманган вилояти ҳокимининг туризм ва спорт масалалари бўйича маслаҳатчиси этиб тайинланди.

Ботиржон Нуриддинов 1976 йилда Наманган шаҳрида туғилган. Маълумоти олий, Наманган муҳандислик-педагогика институти, Президент ҳузуридаги Давлат бошқаруви академияси ҳамда Осиё ва Тинч океани университетини (Япония) тамомлаган.

2000—2017 йиллар давомида Иқтисодий ночор корхоналар ишлари бўйича вилоят бошқармаси, вилоят кўчмас мулк биржаси, «Ўзагросуғурта» Наманган шаҳар бўлими, Наманган шаҳар ҳокимлигида масъул лавозимларда ишлаган.

У 2017 йилдан буён Япониянинг Hopeas савдо компанияси менежери сифатида фаолият юритиб келаётган эди.

Акбарали Асқаров Наманган вилояти ҳокимининг маданият масалалари бўйича маслаҳатчиси этиб тайинланди.

Акбарали Асқаров 1962 йили Уйчи туманида туғилган. Маълумоти олий, Тошкент давлат консерваториясини тамомлаган.

1988—2018 йиллар давомида Янгиер тумани маданият уйи бадиий раҳбари, «Умид» ансамбли мусиқа раҳбари, «Навбаҳор» ансамбли бадиий раҳбари, Наманган вилояти маданият ишлари бошқармаси бошлиғи, «Ўзбекрақс» вилоят бўлими бадиий раҳбари, Академик ва халқ бадиий жамоалари дирекцияси Наманган вилояти бўлими директори, Маданият ва спорт ишлари вазирлиги бошқарма бошлиғи ўринбосари, Алишер Навоий номидаги Наманган вилоят мусиқали драма театри директори, «Мумтоз» ашула ансамбли бадиий раҳбари лавозимларида ишлаган.

У 2018 йилдан буён Ўзбекистон давлат филармонияси ўзбек миллий мумтоз ашула ансамбли бадиий раҳбари сифатида фаолият юритиб келаётган эди.