Россияда «Ту-154» самолёти ўзининг сўнгги фуқаролик рейсини амалга оширди

Россия фуқаролик авиациясида қолган ягона «Ту-154» самолёти ўзининг энг сўнгги парвозини амалга оширди, деб хабар беради «РИА Новости».

Маълумотларга кўра, 28 октябрь куни Алроса авиакомпаниясига тегишли, борт номери RА-85755 лайнер Ёқутистондаги Мирний шаҳридан Новосибирскка икки соатлик парвозни амалга оширган. Самолёт бортида 140 нафар йўловчи бўлган. Учишга яроқлилик бўйича сертификатининг амал қилиш муддати тугаган ҳаво кемаси кейинги қарор қабул қилингунига қадар Толмачёва аэропортида қолади.

Маълумот учун, «Туполев» конструкторлик бюроси томонидан яратилган«Ту-154» самолёти 1972 йилда эксплуатацияга топширилган (илк парвозни 1968 йилнинг октябрида) амалга оширган.

Шунингдек, 1977 йилда биринчи бор «Ту-154» самолёти Куйбишевдан (Россия) Тошкентга (Ўзбекистон) парвозини амалга оширган бўлиб, унинг эксплуатацияси Ўзбекистонда 2010 йилга қадар давом этган. «Ўзбекистон ҳаво йўллари» миллий авиакомпаниясига тегишли бўлган сўнгги «Ту-154» охирги маротаба 2010 йилнинг 31 декабрида Тошкент—Нукус—Тошкент йўналиши бўйича парвозни амалга оширган эди.