Озарбайжон президенти Илҳом Алиев Россия пойтахтида Арманистон бош вазири Никол Пашинян билан музокара ўтказишга тайёрлигини маълум қилди, бироқ Алиев Арманистон ҳукуматининг Тоғли Қорабоғ можаросини ҳал қилиш бўйича конструктив иш олиб бора олишига шубҳа билдирган. Бу ҳақда «Интерфакс» хабар берди.
«Мен бундай таклифни (Москвада музокаралар учун) олмадим. Мен Озарбайжон, Арманистон ва Россия президентларининг уч томонлама учрашувларида бир неча марта қатнашганман, бироқ Арманистонда ҳокимиятга Пашинян келганидан кейин бундай учрашувлар бўлмади. Бу учрашувлар Арманистоннинг аввалги президентлари билан бўлган, мен бу учрашувлардан ҳеч қачон бўйин товламаганман», — дея маълум қилган Алиев.
Илҳом Алиевнинг қайд этишича, у мазкур учрашувларни ижобий деб ҳисоблаган, чунки Россия Минск гуруҳининг ҳамраиси сифатида муаммони ҳал қилишда алоҳида рол ўйнайди.
«Россия ҳар доим Арманистон ва Озарбайжон билан яқин алоқаларни қўллаб-қувватлаган, бугун эса сиёсий, иқтисодий ҳамкорлик йўналишида Россия Озарбайжон ва Арманистон билан жуда фаол ҳамкорлик қилмоқда, бизнинг қўшнимиз. Шунинг учун, албатта, бундай учрашувлар кўпроқ Россия ҳудудида ўтказилган, бироқ Пашинян даврида бундай учрашувлар бўлмади. Улар ҳозир қанчалик самарали бўлишини билмайман. Агар бундай таклиф келса, биз ҳар доим уни ижобий кўриб чиққанмиз ва кўриб чиқамиз», — дея таъкидлаган Озарбайжон президенти.
Илҳом Алиев Москвага Арманистон бош вазири билан музокара ўтказиш учун ҳеч қандай шартларсиз етиб боришга тайёрлигини билдирган.
Аввалроқ Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилганди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган учта уринишга қарамасдан, 27 сентябрдан буён давом этмоқда.
Изоҳ (0)