Давлат божхона қўмитаси ахборот хизмати сўнгги кунларда аниқланган қонун бузилиш ҳолатлари ҳақида ахборот берди, дея хабар бермоқда «Kun.uz».

Фото: «Kun.uz»

Тошкент вилояти божхона бошқармаси Контрабандага қарши курашиш ва божхона аудити бўлими ходимлари томонидан кучли таъсир қилувчи дори воситаларининг ноқонуний айланмасига чек қўйиш мақсадида тезкор тадбир ўтказилди.

Тадбир давомида фуқаро Қ.Б. бошқарувидаги KIA Bongo 3 русумли автотранспорт воситаси тўхтатилиб, холислар иштирокида кўздан кечирилди.

Натижада автоулов юкхонасида ҳеч қандай ҳужжатлари бўлмаган, хорижда ишлаб чиқарилган, умумий қиймати 150 миллион сўмлик, жами 1000 дона «Тропикамид» кучли таъсир қилувчи дори воситалари борлиги аниқланди.

Четдан ноқонуний олиб кирилган 300 миллион сўмлик «КамАЗ» фош бўлди

Фото: «Kun.uz»

Наманган вилояти божхона бошқармаси Контрабандага қарши курашиш ва божхона аудити бўлими ходимлари ДХХ Чегара қўшинлари ҳарбий хизматчилари билан ҳамкорликда тезкор тадбир ўтказди. Унда фуқаро Ш.А. бошқарувидаги «КамАЗ 65115» русумли юк автомашинаси тўхтатилиб, белгиланган тартибда кўздан кечирилди.

Текширув давомида ушбу умумий қиймати 300 миллион сўмлик юк автомашинасига тегишли ҳужжатлар автомашинанинг идентификацион белгиларига тўғри келмаслиги ҳамда қўшни мамлакатдан ноқонуний тарзда олиб кирилгани аниқланди.

Маълум бўлишича, қонунбузар ҳуқуқни муҳофаза қилувчи идоралар ходимларини чалғитиш мақсадида ушбу ноқонуний олиб кирилаётган «КамАЗ»га бошқа бир «КамАЗ»нинг давлат рақамини тақиб олган.

Cobalt’даги 5500 дона тамаки маҳсулотлари манзилга етиб бормади

Фото: «Kun.uz»

Фарғона вилояти божхона бошқармаси Контрабандага қарши курашиш ва божхона аудити бўлими ходимлари фуқаро А.Ш. бошқарувидаги Cobalt русумли автомашинани тўхтатиб, ўрнатилган тартибда кўздан кечирди.

Натижада автомашина юкхонасида унда йўловчи сифатида ҳаракатланиб кетаётган фуқаро Т.М.га тегишли бўлган, божхона расмийлаштирувидан ўтганини тасдиқловчи ҳужжатлари ҳамда акциз маркалари бўлмаган, умумий қиймати 60,5 миллион сўмлик 5500 қути тамаки маҳсулотлари борлиги аниқланди.

Ҳозирда юқоридаги ҳолатлар юзасидан божхона органлари томонидан суриштирув ҳаракатлари олиб борилмоқда.

Аввалроқ Сирдарёда 113 миллион сўмлик тиббий буюмлар ва вирус блокаторларининг ноқонуний айланмасига чек қўйилгани ҳақида хабар берилганди.