Беларусь президентлигига собиқ номзод, мухолифат вакили Светлана Тихановская мамлакатда янгидан президентлик сайловларини ўтказиш юзасидан музокаралар шу йили бошланиши, сайловларнинг ўзи эса йил охиригача ўтказилиши лозимлигини билдирди, деб ёзмоқда «РИА Новости».
Тихановская Данияга ишчи ташрифи чоғида шундай мазмундаги баёнот билан чиқиш қилган, унда у хориж давлатларини ҳам сайловлар борасида музокараларда кўмак сўраган.
«ЕХҲТ парламент ассамблеясининг вакиллари билан муҳим учрашув ўтказилди. Унда мамлакатда янги сайловларнинг ўтказилиши лозимлиги ва бошқа хориж давлатлари ҳам бу борадаги музокараларда иштирок этиши муҳокама қилинди. Светлана янги сайловлар бўйича музокаралар 2020 йилда бошланиши ва сиёсий жараённинг ўзи ҳам шу йили ўтказилиши кераклигини таъкидлади», – дейилади Тихановская ахборот хизматининг Telegram каналидаги баёнотда.
Тихановская Дания ташқи ишлар вазири Еппе Кофод билан учрашган. Дания вакили фуқаролик жамиятини қўллаб-қувватлаш учун «Янги демократия фонди» ташкил қилиниши ва у Беларусга ҳам ёрдам кўрсатишини айтиб ўтган.
Бундан ташқари, Тихановская Дания бош вазири Мэттэ Фредериксен билан ҳам учрашган. Учрашув давомида Беларусь мухолифати вакили мамлакатда ўтиш даврини бошлаш вақти келгани, бу борада ислоҳотлар ўтказиш зарурлигини қайд этган.
Шунингдек, Данияда Тихановская нодавлат гуманитар ташкилотлар вакиллари, Дания ва Европанинг касаба уюшмалари ҳаракати аъзолари билан ҳам учрашган.
Эслатиб ўтамиз, Беларусда 9 август куни бўлиб ўтган сайловларни сохталаштириш ҳақидаги маълумотлар фонида норозилик намойишлари бошланди ва ҳалигача давом этмоқда. Намойишчилар Лукашенкони сайлов натижаларини сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Собиқ президентликка номзод Светлана Тихановскаянинг тарафдорлари 18 август куни янги сайловлар ўтказиш орқали мамлакатда ҳокимиятни транзит қилиш мақсадида Мувофиқлаштирувчи кенгаш тузди. Беларусь бош прокурори Александр Конюкнинг таъкидлашича, Мувофиқлаштирувчи кенгаш фаолияти конституцияга қарши ва ҳокимиятни қўлга олишга қаратилган.
Кенгашнинг ташкил этилиши муносабати билан Жиноят кодексининг 361-моддаси билан жиноят иши қўзғатилиб, унинг доирасида Мувофиқлаштирувчи кенгашнинг бир нечта вакиллари ҳибсга олинган.
Беларусь президенти Александр Лукашенко 10 октябрь куни Давлат хавфсизлик қўмитаси тергов ҳибсхонасида Мувофиқлаштирувчи кенгаш ва мухолифатнинг қўшма штабининг ҳибсга олинган вакиллари билан учрашди. Кейинчалик Беларусь ҳукумати Светлана ва Сергей Тихановскийга 134 кун ичида биринчи марта суҳбатлашишига рухсат этди, 13 октябрда Тихановскаянинг Беларусь ҳукуматига «халқ ультиматум»ини эълон қилгани ҳақида хабар берилди. Мухолифат етакчиси амалдаги президентга ўйлаб кўриш учун 25 октябргача муҳлат берган. Агар Лукашенко ўз лавозимини тарк этмаса, 26 октябрь куни мамлакатда халқ қўзғолони кўтарилади ва ҳукуматга қарши ҳаракатлар бошланади.
21 октябрда Светлана Тихановская беларуслардан 26 октябрда ишга, ўқишга чиқмасликни сўраган ва халқ қўзғолонини қўллаб-қувватлаганлар учун кафил бўлишга тайёрлигини билдирган.
Изоҳ (0)