Belarus muxolifatining yetakchisi Svetlana Tixanovskaya belaruslardan 26-oktabrda ishga, o‘qishga chiqmaslikni so‘radi va xalq qo‘zg‘olonini qo‘llab-quvvatlaganlar uchun kafil bo‘lishga tayyorligini bildirdi. Tixanovskayaning matbuot xizmati uning 26-oktabrda xalqqa ushbu mavzuda murojaat qilishi haqida xabar berdi.

Foto: EPA

“26-oktabrda ishga yoki o‘qishga bormang — bu norozilik namoyishi. Maydonlarga chiqish — bu ham qo‘zg‘olon. Idora va ofislariningizni yoping – bu ham norozilik ifodasi. Davlat xizmatlari va servislaridan foydalanishni to‘xtating – bu ham g‘alayon. Bankdagi hisob raqamingizda turgan pullarni yechib oling – bu ham isyon. Jim turmang”, — deyiladi xabarda.

Tixanovskaya norozilik bildirgan fuqarolar iqtisodiy zo‘ravonlikka uchrasa yoki ishdan bo‘shatilsa, ularga BySol fondidan mablag‘ ajratilishi haqida va’da bergan.

“Umummilliy qo‘zg‘olonga qo‘shilgan har bir belarusga ko‘mak beraman. Bu ishchilarning mas’uliyati talabalar, tadbirkorlar, tumandagi qo‘shnilar, haydovchilar, olimlar yoki nafaqaxo‘rlarga ham taqsimlanishini anglatadi”, – degan Belarus muxolifati yetakchisi.

Shuningdek, Tixanovskaya hukumat tepasiga keladigan bo‘lsa, kommunal to‘lovlar uchun joriy qilingan barcha jarimalar bekor qilinishi, sudlanganlar oqlanishi va ma’muriy jarimalar bekor bo‘lishi, ish joyini yo‘qotganlar lavozimiga qayta tiklanishi, shuningdek, ishda to‘lovlar sabab ushlab turilganlarga moliyaviy amnistiyalar berilishini aytmoqda.

Eslatib o‘tamiz, Belarusda 9-avgust kuni bo‘lib o‘tgan saylovlarni soxtalashtirish haqidagi ma’lumotlar fonida norozilik namoyishlari boshlandi va haligacha davom etmoqda. Namoyishchilar Lukashenkoni saylov natijalarini soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.

Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.

Sobiq prezidentlikka nomzod Svetlana Tixanovskayaning tarafdorlari 18-avgust kuni yangi saylovlar o‘tkazish orqali mamlakatda hokimiyatni tranzit qilish maqsadida Muvofiqlashtiruvchi kengash tuzdi. Belarus bosh prokurori Aleksandr Konyukning ta’kidlashicha, Muvofiqlashtiruvchi kengash faoliyati konstitutsiyaga qarshi va hokimiyatni qo‘lga olishga qaratilgan.

Kengashning tashkil etilishi munosabati bilan Jinoyat kodeksining 361-moddasi bilan jinoyat ishi qo‘zg‘atilib, uning doirasida Muvofiqlashtiruvchi kengashning bir nechta vakillari hibsga olingan.

Belarus prezidenti Aleksandr Lukashenko 10-oktabr kuni Davlat xavfsizlik qo‘mitasi tergov hibsxonasida Muvofiqlashtiruvchi kengash va muxolifatning qo‘shma shtabining hibsga olingan vakillari bilan uchrashdi. Keyinchalik Belarus hukumati Svetlana va Sergey Tixanovskiyga 134 kun ichida birinchi marta suhbatlashishiga ruxsat etdi, 13-oktabrda Tixanovskayaning Belarus hukumatiga “xalq ultimatum”ini e’lon qilgani haqida xabar berildi. Muxolifat yetakchisi amaldagi prezidentga o‘ylab ko‘rish uchun 25-oktabrgacha muhlat bergan. Agar Lukashenko o‘z lavozimini tark etmasa, 26-oktabr kuni mamlakatda xalq qo‘zg‘oloni ko‘tariladi va hukumatga qarshi harakatlar boshlanadi.