Машҳур америкалик киноактёр Арнольд Шварценеггернинг юраги операция қилинди. Калифорниянинг собиқ губернатори бу ҳақда 23 октябрь куни ўз Twitter саҳифасида маълум қилди, дея хабар бермоқда «Корреспондент».
Қайд этилишича, юрагининг аорта қопқоғи (клапан) алмаштирилган. Актёрнинг сўзларига кўра, операция Кливленд клиникасида амалга оширилган.
«Кливленд клиникасидаги жамоага раҳмат. Менда операциядан кейин янги аорта қопқоғи пайдо бўлди. Мен ўзимни фантастик даражада яхши ҳис қиляпман ва аллақачон Кливленд атрофида шаҳардаги ажойиб ҳайкалларни томоша қилиб юрибман», – деб ёзган 73 ёшли актёр.
Постга у касалхонада ва шаҳар атрофидаги сайр пайтида олинган бир нечта фотосуратларни илова қилди.
Маълумот учун, аорта қопқоғи қоннинг юрак чап қоринчасидан аортага ўтишини таъминлайди. Унинг нормал ишламаслиги юракнинг ишдан чиқишига олиб келади. Бунинг олдини олиш учун қопқоқ ўзгартирилади.
Изоҳ (0)