Испанияда коронавирус инфекциясининг тарқалиши туфайли яна фавқулодда ҳолат режими эълон қилинди. Бу ҳақда Reuters хабар берган.
Фото: BBC
Фавқулодда ҳолат тартиби 25 октябрь оқшомидан бошлаб кучга кирган. Канар оролларидан ташқари, мамлакатдаги барча ҳудудларнинг ҳукуматлари комендантлик соати жорий қилади. Комендантлик соатини соат 23:00 дан 06:00 гача белгилаш тавсия этилган, маҳаллий ҳукуматларга ушбу оралиқни бир соатга қисқартириш ёки узайтириш ҳуқуқи берилган, дейилади El Pais хабарида.
Шунингдек, муайян шарт-шароитларда фавқулодда ҳолат тартиби вақтида ҳудудлараро ҳамда ички ҳаракатланиш чекланиши мумкин. Ҳозирча ресторанлар, дўконларни ёпиш, сайр қилишни тақиқлаш ва барча ходимларни масофадан туриб ишлаш тартибига ўтказиш режалаштирилмаган.
Испания ҳукумати 15 кунлик муддатда фавқулодда ҳолат режими эълон қилиш ҳуқуқига эга. Ушбу муддатдан узоқроқ қўшимча фавқулодда ҳолат тартиби парламентнинг тасдиғидан ўтказилади. Испания бош вазири Педро Санчес парламентдан фавқулодда ҳолат режимини 9 ноябргача (9 ноябрь ҳам ҳисобланади) деб белгилашни сўраган.
«Биз экстремал вазиятдамиз, бу охирги ярим аср ичидаги энг қалтис ҳолат» — деган ҳукумат раҳбари фавқулодда ҳолатни жорий этиш муҳокама қилинган мажлисдан кейин.
Испанияда март ўрталарида ҳам фавқулодда ҳолат эълон қилинган. Тартиб 21 июнгача амалда бўлган, сўнгра мамлакатдаги чекловлар босқичма-босқич юмшатилганди.
Кузда Испанияда ҳам бошқа Европа мамлакатларидаги каби коронавирус инфекциясига чалиниш ҳолатларининг сони кескин кўпайди. 22 октябрда Испанияда COVID-19 билан касалланишларнинг суткалик кўрсаткичи янгиланди — шу куни 20 986 та янги касалланиш ҳолати қайд этилган.
Пандемия бошланганидан буён (2020 йил 25 октябрь ҳолатига) Испанияда жами 1 046 132 та касалланиш ҳолати кузатилган, 34 452 киши касаллик асоратлари оқибатида вафот этган.
