Ispaniya bosh vazirining rafiqasida koronavirus aniqlandi. Ispanlarning alohida zaruratsiz ko‘chaga chiqishi taqiqlandi

Ispaniya bosh vaziri Pedro Sanchesning rafiqasi — Begonya Gomes COVID-19 koronavirusi bilan kasallandi. Bu haqda Ispaniya bosh vaziri idorasining rasmiy bayonotiga asoslanib, “RBK” xabar bermoqda.

“So‘nggi soatlarda Monkloa saroyida bosh vazirga yaqin kishilar o‘rtasida o‘tkazilgan tahlillar uning rafiqasi Begonya Gomes bilan bog‘liq holatda ijobiy natija ko‘rsatdi”, — deyiladi xabarda.

Qayd etishlaricha, Ispaniya bosh vaziri va uning 45 yoshli ayoli o‘zini yaxshi his qilmoqda. Ularning har ikkisi Monkloa saroyida va sog‘liqni saqlash organlari tomonidan belgilangan profilaktika choralariga to‘liq rioya etmoqda.

Avvalroq Ispaniya rasmiylari koronavirus tarqalishi xavfi sabab butun mamlakat bo‘ylab harakatlanishga cheklovlar o‘rnatgan edi. Xususan, uydan ko‘chaga faqat ishga, oziq-ovqat olish uchun do‘konga, dori olish uchun dorixonaga, shuningdek, birinchi galda zarur boshqa mahsulotlarni sotib olish uchungina chiqish mumkin.

Ushbu cheklovlar keksa odamlar, bolalar, nogironligi bor insonlarga g‘amxo‘rlik qilayotganlar yoki bank va sug‘urta kompaniyalariga borayotganlarga taalluqli emas. Bundan tashqari, hukumat favqulodda (fors-major) holatlar ham inobatga olinishini bildirgan.

Ispaniyada koronavirus infeksiyasining tarqalishi munosabati bilan oziq-ovqat do‘konlari va dorixonalardan boshqa barcha do‘konlar yopilmoqda, bar, mehmonxona va o‘quv muassasalarining faoliyati vaqtincha to‘xtatilmoqda.

Ispaniyada koronavirus yuqtirib olish bilan dastlabki holat 1-fevral kuni aniqlangan edi. 15-mart holatiga ko‘ra, mamlakatda koronavirusga chalinish bilan bog‘liq salkam 6,4 mingta holat aniqlangan, 196 kishi vafot etgan, 517 kishi sog‘aygan.