Uzbekistan GTL’ni qurayotgan kompaniya mehnat qonunchiligi talablarini qo‘pol ravishda buzgani ma’lum qilindi
Uzbekistan GTL zavodini qurayotgan Enter Engineering kompaniyasi Mehnat kodeksining 161-moddasini qo‘pol ravishda buzgan. Bu haqda deputat Odiljon Tojiyev o‘z Telegram kanalida ma’lum qildi.
“G‘uzor tumanidagi Uzbekistan GTL zavodini qurayotgan Enter Engineering kompaniyasining ishchilarga oylik maosh to‘lamasdan ishlatayotganlik holati Mehnat kodeksi talablarini qo‘pol ravishda buzishdir.
O‘zbekiston Respublikasi Mehnat kodeksining 161-moddasida xodimning mehnatiga haq to‘lash har yarim oyda bir martadan kam bo‘lishi mumkin emasligi belgilab qo‘yilgan.
Vaziyatning shu darajaga yetib kelishiga kompaniya rahbariyati bilan birgalikda mehnat muhofazasi bo‘yicha vakolatli organ Bandlik va mehnat munosabatlari vazirligi, Qashqadaryo viloyati hokimligi va boshqa tegishli tashkilotlarning nazoratsizlik hamda befarqlikka yo‘l qo‘ygani ham sabab bo‘lgan deb hisoblaymiz.
Biz ushbu masala bo‘yicha vazirlik hamda Qashqadaryo viloyati hokimligidan izoh so‘radik va bugun kun yakuniga qadar muammo ijobiy hal etilishi haqida axborot oldik. Qisqa vaqt ichida Bandlik va mehnat munosabatlari vazirligi hamda viloyat hokimligiga Oliy Majlis Qonunchilik palatasi deputatlariga hisobot berish vazifasi yuklatildi.
Muammo hal etilguniga qadar bu ish deputatlar nazoratida bo‘ladi” – deb yozadi Odiljon Tojiyev.
Eslatib o‘tamiz, 21-oktabr kuni ijtimoiy tarmoqlar va Telegram kanallarda Enter Engineering kompaniyasining Qashqadaryo viloyati G‘uzor tumanidagi obyektlaridan biridagi ishchilarning noroziligi aks etgan videoyozuvlar tarqaldi. Bunga izoh bergan kompaniya rahbariyati ishchilarining ommaviy noroziligiga nonushta o‘z vaqtida berilmagani sabab bo‘lganini ma’lum qildi. Keyinchalik Energetika vazirligi Uzbekistan GTL’dagi vaziyat barqarorlashganini, barcha muammo va masalalar joyida ijobiy hal etilganini xabar qildi.
Uzbekistan GTL zavodi qurilishidagi ishchilarining ommaviy noroziligiga ularning ish kuni ko‘payib, dam olish kuni o‘zgarishsiz qolgani ham sabab bo‘lgani ma’lum qilingan. Zavod ishchisi Oybek Sherbo‘tayevning ma’lum qilishicha, avvallari ular 22 kun ishlab 8 kun dam olgan. Hozir esa 45 kun ishlatib keyin uyga javob berishayotganini aytgan.
“Daryo”ning Telegram’dagi manziliga shikoyat yo‘llagan murojaatchiga ko‘ra, zavod ishchilarining noroziligiga yotoqxonada ishchilar uchun joy yo‘qligi, uch oydan buyon maosh to‘lanmayotgani va boshliqlar ishchilariga qo‘pol munosabatda bo‘layotgani ham sabab bo‘lgan.
