Самарқандда эр хотинини бўғиб ўлдириб, арқонга осиб қўйди

Самарқанд вилояти Пастдарғом туманида эр хотинини ўлдириб қўйди, дея маълум қилмоқда «Xabar.uz».

Қайд этилишича, Пастдарғом туманининг «Зангибой» маҳалласида истиқомат қилувчи фуқаро хотинини ўлдириб қўйган. Воқелик 22 октябрь куни юз бергани айтилмоқда.

Бош прокуратура матбуот хизмати раҳбари Ҳаёт Шамсутдинов воқелик юз берганини тасдиқлади. Унинг аниқлик киритишича, 1991 йилда туғилган эр 1996 йилда туғилган турмуш ўртоғини калтаклаб эмас, бўғиб ўлдириб қўйган.

Сўнг жиноятини яшириш мақсадида гўёки аёли ўз жонига қасд қилгандай таассурот уйғотиши учун мурдани яшаш уйининг қурилиши тугалланмаган қисмига олиб кириб, арқондан ясалган сиртмоқни бўйин қисмига боғлаб қўйган. Шундан сўнг хотини ўзини ўзи осиб қўйгани ҳақида ИИБга хабар беради.

Бироқ туман прокуратураси терговга қадар суриштирув ўтказиш жараёнида асл воқеликни аниқлади. Шу тариқа унга нисбатан Жиноят кодексининг 97-моддаси (қасддан одам ўлдириш) билан жиноят иши қўзғатилиб, процессуал тартибда қўлга олинди.

Айни пайтда тергов ҳаракатлари давом этмоқда.

Аввалроқ Тошкентда хотинини боласининг ахлатини ейишга мажбур қилган эркак ва Хоразмда оилавий жанжал оқибатида хотинини бўғиб ўлдириб қўйган эркак қўлга олингани хабар қилинганди.