Россия Федерал хавфсизлик хизмати Москва вилоятида қўлбола бомбадан фойдаланиб, теракт уюштиришни режалаштирган Марказий Осиё мамлакатларидан бирининг фуқаросини қўлга олди. Бу ҳақда «Интерфакс» хабар берди.
Маълум қилинишича, қўлга олинган шахс 1999 йилда туғилган бўлиб, халқаро террорчилик ташкилотларининг жангарилари томонидан берилган кўрсатмалар асосида ҳаракат қилган. У давлат органларидан бирининг биносида қўлбола портловчи восита ёрдамида теракт уюштиришга тайёрланган.
ФХХ томонидан хабар берилишича, режалаштирилган терактдан кейин мазкур шахс Яқин Шарқдаги жанговар ҳаракатлар ҳудудига террорчилик гуруҳлари фаолиятида иштирок этиш учун кетишни режа қилган.
Қайд этилишича, террорчи томонидан жиҳозланган яширин хонада қўлбола портловчи воситаларнинг қисмлари, фойдаланилган алоқа воситаларида эса режалаштирилган теракт юзасидан жангарилар билан амалга оширилган ёзишмалар, портловчи моддалар тайёрлаш бўйича интернет қўлланма, шунингдек, террорчилар бошлиғига қилинган қасамёд видеоёзуви топилган.
Шунингдек, қўлга олинган шахснинг буюмлари орасидан ИШИД байроғи, бир нечта мобил телефон ва тўппонча топилган.
Айни пайтда қўзғатилган жиноят иши доирасида зарур тезкор қидирув тадбирлари ва тергов ҳаракатлари амалга оширилмоқда.
Аввалроқ Россия Федерал хавфсизлик хизмати Волгоград шаҳрида Суриядаги террорчилар кўрсатмаси асосида теракт режалаштирган икки нафар жангарини йўқ қилганди, Кейинроқ мазкур шахслар Ўзбекистон фуқаролари бўлгани маълум қилинди.
Изоҳ (0)