Жаҳон соғлиқни сақлаш ташкилоти (ЖССТ) 22 октябрь куни COVID-19’га чалинганлар сони бир кеча-кундузда рекорд даражада — 423 819 кишига ўсганини қайд этди, деб ёзади Meduza. Бу 17 октябрдан буён кузатилган максимал кўрсаткичдир, ўшанда қарийб 413 минг кишида коронавирус аниқланган эди.
ЖССТ маълумотларига кўра, бир кеча-кундузда дунё бўйича 6424 киши коронавирусдан вафот этган.
COVID-19’га чалиниш бўйича янги ҳолатлар рекорд даражада кўпайгани ҳақида Испания ва Франция ҳукуматлари маълум қилди. Франция соғлиқни сақлаш хизматларига кўра, 24 соат ичида 41 622 кишида вирус аниқланган. Испанияда эса бир кунда 20 986 та коронавирусга чалиниш ҳолати қайд этилган.
Францияда, расмий ҳисоб-китобларга кўра, 999 043 кишида COVID-19 аниқланган. Аммо реал вақтда коронавирус билан боғлиқ вазиятни кузатиб борувчи Жонс Ҳопкинс университети маълумотлари бўйича, Францияда 1 041 991 киши вирусга чалинган.
Испанияда 22 октябрь ҳолатига кўра, 1 026 281 нафар COVID-бемор қайд этилган.
Коронавирусга чалиниш бўйича янги ҳолатларнинг энг кўп сони АҚШда аниқланди — 60 мингдан ортиқ бемор. Яна 55 мингдан ортиқ ҳолат Ҳиндистонда тасдиқланди. Буюк Британияда эса 26 мингта ҳолат қайд этилди.
Пандемия бошидан буён, ЖССТ маълумотларига кўра, дунёда 41,104 миллион киши COVID-19 билан касалланган, 1,128 миллиондан ортиқ киши вафот этган.
Изоҳ (0)