Путин Навальнийни чет элга қўйиб юборишни Бош прокуратурадан шахсан ўзи сўраганини айтди

Россия президенти Владимир Путин сиёсатчи Алексей Навальний даволаниш учун Германияга қўйиб юборилишига шахсан ўзи ёрдам берганини маълум қилди, деб ёзади Meduza.

«Бу фуқаронинг рафиқаси менга мурожаат қилганидан кейин дарҳол прокуратурага унинг даволаниш учун чет элга чиқиш имкониятини текшириб кўришни буюрдим, чунки унда суд текшируви ва жиноят иши билан боғлиқ чекловлар борлиги учун чиқарилмаслиги ҳам мумкин эди. Унинг мамлакатдан чиқишига чекловлар бор эди. Мен бош прокуратурадан бунга рухсат беришни сўрадим. У жўнаб кетди», — деди Путин.

Президент, шунингдек, «фигурант» Россия ҳукумати томонидан заҳарланганида унинг чет элга кетишига рухсат берилмаган бўлишини айтди.

Россия президенти таъкидлашича, Москва Навальнийнинг заҳарланишини текширишда халқаро ҳамкорликка тайёр. У Германия Россия ҳуқуқ-тартибот органлари сўровларини эътиборсиз қолдираётганидан шикоят қилди. Путиннинг сўзларига кўра, шу сабабли Россияда жиноят иши қўзғатиш учун асослар йўқ.

Навальний штабларининг минтақавий тармоғи раҳбари Леонид Волков Путиннинг гапларини изоҳлар экан, президент Лавров-Пригожин мавзулар мажмуини такрорлаётганини айтди.  «Путин 22 августдаги мавзулар мажмуи билан ҳозир, 22 октябрда жуда аянчли кўриняпти — икки ой ичида яхшироқ бирон нарса ўйлаб топишса бўларди», — деди Волков.

Навальнийнинг аҳволи 20 августда Томск–Москва рейсида учаётган самолётда ёмонлашган, лайнер Омскка фавқулодда қўнишни амалга оширган. У ерда Навальний сунъий кома ҳолатида икки кун ётган, кейинчалик Берлиндаги «Шарите» клиникасига олиб кетилганди. Айни вақтда Навальний Германияда касалликдан кейин реабилитацияни ўтказмоқда. Германия ҳукумати Навальнийга «Новичок» гуруҳига мансуб заҳар билан суиқасд уюштирилганини маълум қилган.

Россия президенти Владимир Путин Франция давлат раҳбари Эммануэль Макрон билан суҳбатда россиялик сиёсатчи Александр Навальнийнинг ўзи номаълум сабабларга кўра «Новичок» гуруҳига мансуб заҳарни ичган бўлиши мумкинлигини тахмин қилган, кейинчалик Навальний заҳарни ўзи қабул қилган бўлиши мумкинлиги тўғрисидаги Путиннинг тахминига жавоб қайтарганди.

Аввалроқ Алексей Навальний ўзининг заҳарланишида президент Владимир Путин шахсан алоқадор, деб ҳисоблашини маълум қилганди. Россия ташқи ишлар вазирлиги эса сиёсатчининг заҳарланиши билан боғлиқ вазият саҳналаштирилган бўлиши мумкинлиги ҳақидаги тахминни илгари сурганди.