22 октябрь куни ижтимоий тармоқларда Наманган вилояти Учқўрғон тумани ИИБ ходимлари ниқобсиз эркакни машина ичидан куч билан тортиб олишга уринаётгани тасвирланган видео тарқалди. Repost’нинг ёзишича, вилоят ИИБ мазкур ҳолат юзасидан тушунтириш берган.
Хабарда айтилишича, 7 октябрь куни Учқўрғон туманининг Кайки кўчасида профилактика инспекторлари — А.Ўринов ва С.Деҳқонов тиббий ниқоб тақмаган уч нафар эркак гаплашиб турганини кўриб қолган ва уларга нисбатан маъмурий баённома тузишга уринган. Эркаклардан бири ўзининг Nexia-2 автомобили томонига югуриб, воқеа жойидан қочиб кетишга уринган.
Таъкидланишича, инспектор А.Ўринов автомобилга яқинлашиб, фуқародан тушишини сўраган. Эркак эса инспекторнинг қонуний талабига бўйсунишдан бош тортган. Бунинг ўрнига у савол беришга тушган: «Нега исмимни айтишим керак, ўзимни автомобилимда ўтирибман-ку?».
Шунингдек, маълум қилинишича, эркак хизмат вазифасини бажараётган инспекторларни ҳақорат қилишга тушган.
Ҳолат юзасидан ушбу фуқарога нисбатан Маъмурий жавобгарлик тўғрисидаги кодексининг 40-моддаси 1-қисми (туҳмат), 54-моддаси 1-қисми (радиацион хавфсизликка доир қоидалар, нормалар, йўриқномалар ва бошқа талабларни бузиш) ва 194-моддаси 1-қисми (ички ишлар органлари ходимининг қонуний талабларини бажармаслик) билан маъмурий баённома тузилган ва Маъмурий ишлар бўйича Учқўрғон туман судига тақдим этилган.
Аввалроқ интернетда Самарқандда ҳуқуқ-тартибот ходимлари 16 ёшли ўсмирни бўйнидан тортиб патруль машинасига ўтқазиб, олиб кетгани тасвирланган видео тарқалган эди.
Мавзуга доир: Фарғонада ниқоб тақмаган фуқароларни камера ёрдамида аниқлаш бошланди. Бир кунда 156 кишига жарима белгиланди
Изоҳ (0)