Ҳаж мавсумида Ўзбекистон фуқаролари Саудия Арабистонига қассобчилик ишларига жалб қилиниши мумкин. Бу ҳақда Ташқи меҳнат миграцияси агентлиги, Ўзбекистоннинг Саудия Арабистонидаги элчихонаси ва Ислом тараққиёт банки вакиллари иштирокида видеоконференцалоқа шаклида ўтказилган учрашувда муҳокама қилинди.
Учрашувда Ҳаж мавсумида Ўзбекистон фуқароларини Саудия Арабистонига қассобчилик ишларига жалб қилиш масалалари муҳокама этилган. Хусусан, номзодларга қўйиладиган талаблар, иш шароитлари ва бошқа ташкилий масалалар бўйича фикр алмашилган.
Томонлар яқин вақт оралиғида фуқароларни қассобчиликка жалб қилиш бўйича Ўзбекистондаги мавжуд имкониятлар, хусусан, шариат асосида Ҳаж мавсумида қурбонлик учун ҳайвонни сўйиш тажрибаси, араб ёки инглиз тилини билиш даражаси, фуқароларни ушбу соҳага тайёрлаш имкониятларини ўрганиш бўйича ишларнинг олиб борилишини маълум қилган.
Таъкидланишича, музокаралар натижаси бўйича қўшимча маълумотлар бериб борилади.
Аввалроқ Ўзбекистон фуқаролари Саудия Арабистони ва бошқа араб мамлакатларидаги маиший соҳа ишларига жалб қилиниши тўғрисида хабар берилганди.
Изоҳ (0)