Bring a Trailer аукциони орқали 1996 йилда ишлаб чиқарилган ва ҳозирга қадар 1126 километр йўл босган Chevrolet Corvette 27,5 минг доллар эвазига сотувга қўйилди. Спорткарнинг ўзига хослиги — автомобиль тўртинчи авлод моделнинг якунланишига бағишланган коллекциянинг бир қисми ҳисобланади, деб хабар беради Motor.
Chevrolet Corvette Grand Sport тўртинчи авлод моделни ишлаб чиқаришнинг якунланишига бағишланган хайрлашув махсус версияси ҳисобланади. Corvette C4 1983—1996 йиллар оралиғида конвейрдан чиққан. Америка концерни бу турдаги нусхадан жами 810 та ишлаб чиқарган бўлиб, уларнинг ҳар бири Аdmiral Blue ноёб кўк рангига бўялган.
Савдога қўйилган нусха ажойиб ҳолатда сақланган. Купенинг кузовида ҳеч қандай нуқсонлар йўқ, қора чарм қопланган салони эса худди янгидек. Спорткарга 17 дюймли қора ғилдирак дискалари «кийгизилган». Шунингдек, Corvette’да иқлим ва круиз-назорат тизимлари, ўриндиқларни мослаш тизими ва кассетали ва компакт-дискли Bose аудиотизими мавжуд.
Corvette Grand Sport капоти остидан 330 от кучига (461 Нм) эга 5,7 литрли V8 двигатели ўрин олган. Спорткар агрегати олти поғонали механик узатмалар қутиси билан биргаликда ишлайди. Купе соатига 100 километр тезликка 5,4 сонияда эришади. Максимал тезлиги — 266 км/соатга тенг.
Айни вақтда чекланган нусхада ишлаб чиқарилган Corvette’нинг аукциондаги нархи 27,5 минг долларни ташкил этмоқда.
Аввалроқ идеал ҳолатда сақланган 51 ёшли Chevrolet Corvette сотувга қўйилгани тўғрисида хабар берилганди.
Изоҳ (0)