21 октябрь кунги NASDAQ биржа савдоларининг якуни бўйича Tesla акциялари 3,3 фоизга кўтарилди. Инвесторлар электрокарлар ишлаб чиқарувчининг 2020 йил учинчи чоракдаги ҳисоботига ижобий ёндашган. Компания даромади ўтган йилнинг мос даврига нисбатан 39 фоизга ошганини — 8,77 миллиард долларга етганини маълум қилди. Таҳлилчилар 8,3 миллиард долларгача ўсишни кутганди, деб хабар беради «РБК».
Tesla рекорд даражада фойда кўрган — 331 миллион доллар. Бу 2019 йилнинг мос даврига нисбатан 131 фоизга кўп демак. Компания кетма-кет бешинчи чоракни фойда билан якунламоқда. 2020 йилнинг иккинчи чорагида Tesla’нинг фойдаси 104 миллион долларни ташкил этган бўлса, ундан олдинги учта чоракда мос равишда 143 миллион, 105 миллион ва 16 миллион доллар бўлган.
Энг яхши фойда акциялардан келган: ўтган чоракда уларнинг нархи бир йил олдинги 0,37 доллардан 0,76 долларга етган. Экспертлар қимматли қоғознинг донаси 0,55 доллардан ошмаслигини прогноз қилганди.
Tesla бош директори Илон Маскнинг айтишича, июлдан сентябргача бўлган давр «компания тарихидаги энг яхши чорак»ка айланган. Шунингдек, Tesla ўтган йилги 5,3 миллиард доллар билан таққослаганда жорий йил 14,5 миллиард доллар «пул ёстиқчасини» тўплаган. Шу билан бирга, компания харажатларни ҳам 35 фоизга оширган бўлиб, уларнинг асосий қисми заводлар қурилишига сарфланмоқда.
Шунга қарамай, ўтган чорак компания учун идеалга айланмади. Tesla яна бир бор — кетма-кет тўртинчи маротаба — бошқа автомобиль ишлаб чиқарувчиларнинг ZEV (Zero Emission Vehicle credit) кредитларини сотиш ҳисобига фойда кўрган. Ўтган чоракда уларнинг қиймати 397 миллион долларни ташкил этган.
Tesla анчадан буён ZEV-кредитлардан фойда кўриб келади. Бошқа компаниялар атроф-муҳит ифлосланишига қарши кураш кетаётган баъзи мамлакатлар ва АҚШинг айрим штатларида автомобиль сотиш лицензиясини йўқотиб қўймаслик учун харид қилиб келмоқда. Tesla’да эса бу каби кредитлар кўп, чунки у фақат электрокарларни ишлаб чиқаради.
Эслатиб ўтамиз, Илон Маск 10 июль куни дунёнинг энг бой одамлари рўйхатида 7-ўринга, 20 июль куни 5-ўринга, 17 август куни эса 4-ўринга, 1 сентябрь куни эса Цукербергни ортда қолдириб, дунёнинг энг бой одамлари учлигидан жой олганди.
Изоҳ (0)