Украинада ўтган бир кеча-кундузда коронавирусга чалиниш билан боғлиқ 5469 та янги ҳолат қайд этилди, деб хабар бермоқда «Korrespondent.net» Украина миллий хавфсизлик ва мудофаа кенгаши мониторинг онлайн-харитасига таяниб. Бир кун аввалги кўрсаткич 4766 тага тенг эди.
Пандемия бошидан буён касалликни юқтирганлар сони 309 107 кишига етди.
Касаллик оқибатида мамлакатда бугунги кунгача жами 5786 киши вафот этган, шундан 113 та ҳолат бир кеча-кундузда қайд этилган, бу антирекорд ҳисобланади.
Касалликдан 129 533 киши соғайган, бир кеча-кундузда 3044 киши тузалган, бу ҳам рекорд кўрсаткичдир. Айни пайтда 173 788 киши фаол касал ҳолатда, бир кеча-кундузда беморлар сони 2312 кишига ошмоқда.
Касалланиш ҳолатларининг кўпайиши бўйича Киев (+462), Харьков (+446), Днепр (+285), Житомир (+376), Донецк (+256) ва Полтава вилояти (+249) етакчилик қилмоқда.
Аввалроқ Владимир Зеленский Украинада бир кеча-кундузда касалланганлар сони 9,5 минг кишидан ошса, қатъий чекловлар жорий қилинишини айтди.
Эслатиб ўтамиз, Украинада 17 октябрь куни 6410 нафар кишида коронавирус аниқланиб, кунлик янги антирекорд қайд этилганди.
Дунё бўйича коронавирусга чалинганлар сони 40 миллион кишидан ошди. Касалланганлар сони бўйича биринчи ўринни АҚШ (8,1 миллион киши), ундан кейинги ўринларни Ҳиндистон (7,5 миллион киши) ва Бразилия (5,2 миллион киши) эгаллаган. Тўртинчи ўринда Россия бўлиб, 1,4 миллион киши COVID-19’га чалингани қайд этилган.
Изоҳ (0)