Кремний водийси компаниялари ходимларининг аксарияти (68 фоизи) айни пайтда коронавирус пандемияси бошланмасидан аввал офисда ишлагандан ҳам кўпроқ чарчаётгандек ҳис қилаётганини айтди. Бу ҳақда Blind сервиси сўровномасига таяниб, Business Insider хабар берди. Тадқиқотда Amazon, Microsoft, Google ва Facebook компанияларининг 3 мингдан ортиқ ходими иштирок этган.
Февраль ойидаги сўровнома билан таққослаганда иш жойида кучли толиқиш ҳис қилаётгани ҳақида хабар берган иштирокчилар улуши 61 фоиздан 68 фоизгача ошган. Уларнинг аксарияти Facebook (81 фоиз) ва Google (79 фоиз)да ишлайди.
Ходимларнинг қарийб 60 фоизи пандемия давридан аввалга қараганда кўпроқ ишлаётганини билдирган. Amazon ходимларининг 67 фоизи, Microsoft’да 70 фоиз, Google ва Facebook’да эса ходимларнинг тенг ярми шундай фикр билдирган.
Сўровномада иштирок этганларнинг таъкидлашича, масофадан туриб ишлаган пайтда уларда иш ва шахсий ҳаёт ўртасида мувозанатни сақлашга қийналиш, видеочатлардан чарчаш каби муаммолар пайдо бўлган. «Илгари иш ва оилавий ҳаёт ўртасида қандайдир чегара бор эди, энди эса у йўқ. Уйдан туриб ишламайман, ишимда яшайман», — деган сўровномада иштирок этган Google ходимларидан бири.
Эслатиб ўтамиз, март ойи бошларида Google коронавирус туфайли ўз ходимларига уйдан ишлашни тавсия қилганди. Май ойида эса Google раҳбарияти ўз ходимларига улар камида 2020 йилнинг октябригача ёки 2021 йилнинг бошига қадар масофадан туриб ишлашлари тўғрисида хат юборган. Facebook ҳам худди шу каби қарорга келган. Компаниянинг маълум қилишича, ходимлар 2020 йил охирига қадар уйда қолиши мумкин.
Изоҳ (0)