Словакияда оммавий равишда COVID-19’га тест олишга тайёргарлик кўрилмоқда

Словакияда аҳоли COVID-19’ни аниқлаш бўйича оммавий равишда тестдан ўтказилиши маълум қилинди, деб хабар бермоқда «Korrespondent.net».

Аҳолиси 5,5 миллион киши бўлган мамлакат ҳукумати учта ҳар хил компаниядан коронавирусга антитанани аниқловчи 13 миллионта тезкор тестга буюртма берган.

Бундай тестлар натижани 15 дақиқадан кейин кўрсатади. Уларнинг тахминий умумий қиймати 57 миллион еврони ташкил этади. «Бу Словакияда ва ўйлайманки, бошқа ҳеч бир давлатда бўлмаган операция бўлади», — деган мамлакат бош вазири Игор Матович.

Шунингдек, унинг қўшимча қилишича, буюртма қилинган тестларнинг ярмидан кўпи келаси ҳафта Словакияга етказиб берилиши керак. «Асосий тестдан ўтказиш икки ҳафтадан сўнг — шанба ва якшанба кунлари бўлиб ўтади», — деган у.

Тестдан ўтказиш бепул бўлиб, Қуролли кучлар ҳомийлигида ўтказилади. Уни амалга оширишга 40 мингдан ортиқ киши жалб қилинади.

Тестлар мажбурий тарзда ўтказиладими ёки ихтиёрий равишда, ҳозирча номаълум. Чунки бунинг учун қонунчиликка ўзгартириш киритишга тўғри келади. Словакия бош вазири тестдан ўтишга аҳолининг камида 90 фоизи келишини тахмин қилмоқда.

Мамлакатда коронавирус сабаб вазият оғирлашгани туфайли 1 октябрдан буён фавқулодда ҳолат эълон қилинган.